Policia e Kosovës ka njoftuar se ka arrestuar dy persona që dyshohen për vjedhjen e një veture të tipit BMW X6 në rrugën “Josip Sela” në Ferizaj pasditen e 16 tetorit.

Sipas njoftimit, fillimisht Policia me datë 17.10.2024 ka arrestuar të dyshuarin e parë M.H. 51-vjeç, të cilin pas intervistimit, me vendim të prokurorit e kanë dërguar në mbajtje për 48 orë.

Ndërsa, në vazhdën e hetimeve,  nga hetuesit rajonal është identifikuar edhe i dyshuari kryesor, i cili kishte arritur që përmes vendosjes së një palë targave të huaja të kalon territorin e Kosovës dhe të largohet në shtetin e Serbisë.

“Pas shumë përpjekjeve, hetuesit rajonalë kanë rënë në kontakt me të dyshuarin F.D i moshës 27 vjeç, i cili me datën 19.10.2024 (sot) është dorëzuar në pikën kufitare me Serbinë, ndërsa ka dorëzuar edhe veturën BMW X6 tek hetuesit rajonalë. Por F.D. u lirua “për procedurë të rregullt hetimore, ndërsa si provë materiale është sekuestruar përkohësisht vetura, deri sa të përfundojnë procedurat e kthimit te pronari i saj”, thuhet në njoftim.

Rasti është cilësuar si “vjedhje e rëndë”.