Bashkimi Evropian e ka bërë të qartë që për Kosovën dhe Serbinë përveç kushteve të përgjithshme për të përfituar nga milionat e Planit të Rritjes, ekzistojnë edhe parakushte të tjera që ndërlidhen me angazhimin konstruktiv në dialog dhe përmbushjen e të gjitha marrëveshjeve të arritura. Nga Brukseli kanë thënë se pa u përmbushur këto parakushte s’do të ketë asnjë pagesë.

Pasi Kosova ka marrë dritën e gjelbër për Reformën e Agjendave, Lëvizja Vetëvendosje në një njoftim në faqen zyrtare në ‘facebook’ e ka marrë si të kryer punën e marrjes së mbi 800 milionë eurove nga BE-ja.

Megjithatë sot në një konferencë për media, zëdhënësja e Komisionit Evropian, Ana Pisonero, ka thënë se do të bëhet një vlerësim i përmbushjes së parakushteve nga Kosova e Serbia në momentin që do të afrohen datat e realizimit të pagesave të para. Në këtë vlerësim ajo ka sqaruar se do të kërkohet edhe opinioni i Shërbimit të Jashtëm të BE-së (EEAS) i cili ka nën ombrellën e vetë edhe dialogun mes Kosovës dhe Serbisë.

“Ajo që mund të them është që këto parakushte do të vlerësohen nga Komisioni përpara pagesave, dhe do të llogarisim rolin dhe kontributin e Shërbimit të Jashtëm të BE-së”, ka thënë Ana Pisonero në konferencë për media.

Agjendat e Refomrave që janë miratuar për Kosovën, Serbinë, Shqipërinë, Malin e Zi dhe Maqedoninë e Veriut, pritet që të marrin miratimin zyrtar në ditët në vazhdim. Pisonero ka thënë se s’mund të japë një datë të saktë për këtë, raporton Express.

“Pas mendimit pozitiv të vendeve anëtare më 11 tetor për axhendat e reformave të paraqitura nga Shqipëria, Kosova, Mali i Zi, Maqedonia e Veriut dhe Serbia, Komisioni tani, si hap tjetër, do të jetë në gjendje të vazhdojë me miratimin zyrtar të axhendat e reformës”, ka thënë Pisonero.

Olvier Varhelyi ka paralajmëruar se pagesat e para do të kryhen gjatë këtij muaji, derisa Pisonero s’ka dhënë ndonjë afat kohor për shkak të procdurave mes BE-së dhe secilit shtet veç e veç.

Kryeministri i Kosovës, Albin Kurti, gjatë një takimi që ka pasur me Drejtorin për Zgjerim të BE-së, Gert Koopman, kishte premtuar se Kosova do të angazhohej në mënyrë konstruktive në dialog dhe që do të zbatojë të gjitha marrëveshjet e arritura në Ohër e Bruksel dhe marrëveshjet e vjetra. BE e ka mirëpritur këtë zotim të kryeministrit Kurti dhe kanë thënë se dëshirojnë të shohin gjërat teksa zbatohen edhe në praktikë.