Kryeministri britanik Keir Starmer i mirëpriti përpjekjet e Italisë për të trajtuar emigracionin e paligjshëm, duke thënë se të dy vendet do të ndajnë inteligjencën dhe do të punojnë më ngushtë së bashku për të “shkatërruar” bandat e kontrabandës së njerëzve.

Në një konferencë të përbashkët për shtyp, Starmer tha se bisedimet e tij me kryeministren italiane Giorgia Meloni do të ndihmonin në zhvillimin e qasjes së Britanisë për të trajtuar ardhjet e parregullta të emigrantëve në varka të vogla.

Starmer tha se qasja e tij ndaj çështjes do të ishte pragmatike dhe do të shënonte një ndryshim nga qeveria e mëparshme, politikën e së cilës për deportimin e azilkërkuesve në Ruanda ai e hodhi poshtë si një “mashtrim”.

“Unë jam plotësisht i fokusuar në atë që mendoj se është mënyra më e mundshme parandaluese dhe efektive për t’u marrë me migracionin e paligjshëm, dhe kjo është të shkatërrosh bandat që drejtojnë këtë tregti të ndyrë”, tha ai në një konferencë të përbashkët shtypi.

“Jam i kënaqur që ne po thellojmë bashkëpunimin tonë këtu për të ndarë inteligjencën, për të ndarë taktika, për të mbyllur rrugët e kontrabandës dhe për të shkatërruar bandat.”

Takimi i Starmer me Melonin është pjesë e një plani për të përmirësuar lidhjet e Britanisë me Bashkimin Evropian.

Starmer tha se ishte “shumë i interesuar” për marrëveshjen e Italisë me Shqipërinë për të përpunuar disa kërkesa për azil në det të hapur, por do të priste të shihte rezultatet pasi marrëveshja nuk është bërë ende funksionale.