Në kuadër të aktiviteteve të fushatës: “Festo me Zemër, jo me Armë”, zëvendësministri i Punëve të Brendshme, njëherë Koordinator Nacional për Kontrollin e Armëve të Vogla, të Lehta dhe Eksplozivëve, Blerim Gashani, së bashku me shefin e Programit të Kombeve të Bashkuara për Zhvillim (UNDP) në Kosovë, Nuno Queiros, kanë vizituar kompaninë poligonin e shenjëtarisë “Katana”, ku janë pritur nga drejtori i poligonit, Agron Jusufi.
Në këtë takim zëvendësministri i MPB-së, Blerim Gashani, vuri në dukje se qëllimi i kësaj vizite tek personi juridik i licencuar nga MPB për disa veprimtari me armë, si qendër trajnimi, poligon për gjuajtje me armë, tregti transport, etj është bërë me qëllim promovimit të sigurisë së përgjithshme, sa i përket parandalimit të shtënave festive dhe keqpërdorimit të armëve të zjarrit.
Me këtë tast, zëvendësministri Gashani kërkoi nga drejtuesit e poligonit “Katana”, që të ndihmojnë institucionet e sigurisë në shtrirjen e mesazheve kyçe në parandalimin dhe keqpërdorimin e armëve të zjarrin, si target i një game të gjerë audiencave që ka zgjedhur Ministria e Punëve të Brendshme, me qëllim të ngritjes së vetëdijes kundër të shtënave festive dhe orientimin, edukimin e qytetarëve që dëshirojnë, ose kanë pasion shenjëtarinë të zgjedhin mekanizma të licencuara dhe të kontrolluara.
Po ashtu në këtë takim, zëvendësministri Gashani theksoi rëndësinë që e ka e gjithë shoqëria së bashku me të gjitha institucionet e sigurisë, që bashkërisht si një mekanizëm të krijojnë ambientin e sigurt për te gjithë qytetaret. Ai theksoi se kjo kërkon mobilizim të përgjithshëm që të raportohen këto raste, ndaj të cilave Policia e Kosovës është duke vepruar.
Ndërsa shefi i Programit të Kombeve të Bashkuara për Zhvillim (UNDP) në Kosovë, Nuno Queiros, theksoi se UNDP është partner për më shumë se një dekadë me MPB-në dhe Policinë e Kosovës në parandalimin dhe trafikimin e armëve, municioneve eksplozivëve dhe prekursorëve. Ai tha se për këtë qëllim, promovimi i sigurisë është objektiv i rëndësishëm dhe për këtë jemi partner me Ministrinë e Punëve të Brendshme në mbështetjen e fushatës vetëdijësuese “Festo me Zemër, jo me armë”.
Ndërsa drejtori i Poligonit të shenjëtarisë “Katana”, Agron Jusufi, theksoi se poligoni është vend ku mësohet përdorimi i drejtë dhe i sigurtë dhe ku arma përdorët vetën për asketin sportiv. Ai tha qasja në armë, është kujtim i rrugës së gjatë, ku rëndësia dhe qëllimi ka qenë e kohës së domosdoshme, por tashmë ndryshimi i kulturës ndaj qasjes për armët kërkon kohë.
Në fund, Jusufi theksoi se, si në rastet ku poligoni “Katana”, promovon dhe mbështetë sportin e shenjëtarisë, do të jetë një partnerë për institucionet e sigurisë edhe në këtë fushatë për të shtrirë mesazhet, për rëndësinë që ka parandalimi i të shtënave me armë.
