Vendet anëtare të NATO-s po diskutojnë aktualisht idenë e Sekretarit të Përgjithshëm, Jens Stoltenberg, për një plan financimi 40 miliardë euro në vit për Ukrainën, megjithëse disa aleatë mbeten skeptikë.
Burime të Bloomberg të njohur me diskutimet, thonë se disa vende anëtare të NATO-s nuk janë të gatshëm të angazhohen për shpenzime specifike shumëvjeçare për ndihmën ushtarake për Ukrainën, e cila do të siguronte më shumë parashikueshmëri në planin afatgjatë.
Burimet thanë se vendet tani janë të ndara se si t’i bëjnë këto angazhime të funksionojnë për vitet e ardhshme, transmeton Telegrafi.
“Disa aleatë janë të kujdesshëm ndaj zyrtarizimit të angazhimeve me një numër specifik dhe thjesht duan të zotohen se do të vazhdojnë të ofrojnë mbështetje në të njëjtin nivel”, thanë burimet.
Ndërkohë, të tjerë hezitojnë të zbulojnë shifra të sakta për kontributet e tyre, nga frika se kjo mund të zbulojë masën e vërtetë të ndihmës së tyre për Ukrainën.
Megjithëse shumë detaje mbeten për t’u rënë dakord, aleatët mund të jenë në gjendje të arrijnë një marrëveshje nëse ndihma prej 40 miliardë eurosh për Ukrainën zbritet nga angazhimi ekzistues i NATO-s për të shpenzuar të paktën 2% të GDP-së për mbrojtjen, thanë burimet.
Megjithatë, kjo mund të çojë në një reduktim të shpenzimeve të mbrojtjes të aleatëve, veçanërisht nëse ministritë e Financave nuk bien dakord të rrisin nivelin e përgjithshëm të shpenzimeve.
Përveç kësaj, aleatët e NATO-s janë ende dakord mbi formulimin për një deklaratë të liderëve në samitin e korrikut që do të përshkruajë përparimin e Ukrainës drejt anëtarësimit në aleancë.
Ndërsa ftesa nuk ka gjasa të ndodhë këtë vit, SHBA dhe Gjermania janë kundër që ta quajnë rrugën e Ukrainës drejt anëtarësimit në NATO “të pakthyeshme”, dhe në vend të kësaj duan ta paraqesin të gjithë paketën si një “urë për anëtarësimin”, thanë burimet.
Përveç kësaj, burimet raportojnë se aleatët po diskutojnë krijimin e një përfaqësuesi të posaçëm në Kiev, për të mbikëqyrur koordinimin ndërkombëtar të furnizimeve me armë dhe trajnimin për Forcat e Armatosura të Ukrainës nën kujdesin e NATO-s. /Telegrafi/
