Sipas Këshillit të Lartë Gjyqësor këto zvarritje po shkaktohen për shkak të ngarkesës së konsiderueshme të gjyqtarëve por edhe për shkaqe proceduriale, sikundër janë marrja e provave apo pritja e letër-porosive nga jashtë vendit.
Por vendin e parë për stokun e çështjeve e mban Gjykata e Lartë që sipas Këshillit të Lartë Gjyqësor në një raportim të kryer nga anëtarja e KLGJ, Brunilda Kadi, stoku ka shkuar në 32 mijë e 106 dosje.
Për këtë shkak theksoi më tej anëtarja e komisionit të veprimtarisë profesionale, qeveria e Gjyqësorit duhet të marrë masa paraprake, për gjetjen e një skeme për zgjidhjen e problemit që duhet të jetë gati sapo Gjykata e Lartë të bëhet funksionale.
Në fakt, çështjen e stokut, në Gjykatën e Lartë e bëri prezente gjatë javës së kaluar edhe kreu i KLGJ, e thirrur nga Komisioni i reformës.
Ndërkohë, Top Channel mësoi se një nga zgjidhjet që po diskutohet është edhe implementimi i formulës së përdorur në Kosovë, për evadimin e fluksit të dosjeve, që bën fjalë për atashimin e një grupi ekspertësh, me së paku 50 juristë të jashtëm, të cilët do të skanojnë dosjet në ndihmë të këshilltarëve ligjorë të gjyqtarëve të lartë.
Por stoku i dosjeve po rritet edhe në gjykatat e tjera, ku kryesojnë Gjykatat Administrative që mbajnë vendin e parë për vonesat. E gjitha kjo, bën aktuale postulatin “drejtësi e vonuar drejtësi e mohuar”.
