Inspektorati i Përgjithshëm për Rindërtimin e Afganistanit, i cili monitoron shpenzimin e miliarda dollarëve në Afganistan, tha në raport se rreth 50 për qind e policisë në Kandahar, Zabul, Helmand dhe Uruzgan përdorin drogë.

Gjithashtu u zbulua se midis 50 dhe 70 për qind e posteve policore ishin në të vërtetë fiktive dhe se askush nuk ishte punësuar.

Në të gjithë Afganistanin, listat e ushtarëve dhe policëve në njësi të shumta kanë emra të rremë ose emrat e njerëzve që vdiqën në luftime, por kurrë nuk u shpallën zyrtarisht të vdekur.

Zëdhënësi i Ministrisë së Brendshme afgane Tariq Arian tha se ministria kishte marrë një raport dhe do të zhvillonte një hetim.

Anëtari i Komitetit të Sigurisë në Parlamentin e Afganistanit, Abdul Satar Husseini nuk u pajtua me raportin, por tha se nuk mund të mohojë se nuk ka përdorues të drogës në mesin e policisë. Ai shtoi se rreth 25 deri në 30 për qind e policëve konsumojnë drogë dhe se ministria po përpiqet t’i identifikojë ata.

Sipas autoriteteve afgane, ka më shumë se 350,000 pjesëtarë të forcave të sigurisë, por as bashkësia ndërkombëtare dhe as autoritetet afgane nuk e dinë numrin e tyre të saktë ose sa janë në dispozicion në çdo kohë të caktuar.

Fillimi i dialogut midis autoriteteve afgane dhe talebanëve, i paraparë me marrëveshjen e paqes në muajin shkurt po vonohet, ndërkohë që SHBA kishte pritje që negociatat të fillojnë në muajin gusht të këtij viti.

Talibanët janë zotuar në një marrëveshje që të mos sulmojnë forcat e SHBA-së dhe NATO-s, por sulmet e tyre ndaj forcave afgane pothuajse janë të përditshme. Ata deklarojnë se një armëpushim i përhershëm do të jetë pjesë e negociatave sapo ato të fillojnë.