Ministri i Punëve të Brendshme, Agim Veliu, priti sot në një takim Kimberly Riffe, atashe e ICITAP-it dhe Shawn Waddoups, drejtor i Byrosë për Çështje Ndërkombëtare të Narkotikëve dhe Zbatimit të Ligjit (INL).
Me këtë rast, u bë e ditur se Ambasada e SHBA-ve, përkatësisht Byroja për çështje Ndërkombëtare të Narkotikëve dhe Zbatimit të Ligjit (INL), ka transferuar automjetet dhe pajisjet e tjera të përdorura (USDOJ-ICITAP) tek agjencitë ekzekutive të Ministrisë së Punëve të Brendshme.
Gjatë këtij takimi bashkëbiseduesit vlerësuan se transferimi i këtyre automjeteve dhe pajisjeve të tjera në MPB është ndihmesë për përmirësimin e ambientit dhe kushteve të punës, duke mundësuar përfundimin më efikas të punëve të përditshme.
Veliu falënderoi Ambasadën e SHBA-së për përkrahjen e vazhdueshme dhe shprehu gatishmërinë e tij për thellim të mëtutjeshëm të bashkëpunimit duke biseduar edhe çështje të tjera me rëndësi për punën dhe menaxhimin e suksesshëm të ministrisë që ai drejton.
