Guvernatori i Nju Jorkut Andrew Cuomo tha sot se ai nuk do të tërhiqej pas akuzave për ngacmim seksual të grave të reja, por përkundrazi kërkoi falje përsëri dhe njoftoi “bashkëpunimin e plotë” me kryeprokurorin e shtetit.

“Unë nuk do të jap dorëheqjen,” tha demokrat Cuomo në një konferencë shtypi, pasi kërkoi falje për sjelljen e tij për shkak se “i bëri njerëzit të pakëndshëm”.

“Ndihem i tmerrshëm për këtë dhe sinqerisht, më vjen turp”, tha guvernatori i Nju Jorkut, i cili ka qenë shënjestër e shumë akuzave javët e fundit, duke përfshirë që qeveria e tij u përpoq të zvogëlojë numrin e vërtetë të vdekjeve nga COVID-19 në shtëpitë e të moshuarve.

Ai tha se sjellja e tij, për të cilën u akuzua për ngacmim seksual, ishte e paqëllimshme. Cuomo pretendon se ai kurrë nuk preku askënd në mënyrë të papërshtatshme, por shtoi se ishte “e zakonshme” që të puthte dhe përqafonte njerëzit gjatë takimeve.

Në Nju Jork, më shumë se 15.000 njerëz kanë vdekur në shtëpitë e të moshuarve që nga fillimi i epidemisë, dhe agjencia shëndetësore e këtij shteti federal bëri të ditur për vetëm 8.5 mijë deri në fund të janarit, raporton BBC.

Cuomo, i cili mori një çmim Emmy në fund të vitit të kaluar për fjalimet e tij të përditshme ndaj gjendjes me koronavirus, pranoi një “vonesë” në botimin e të dhënave në mes të shkurtit dhe e quajti një “gabim”.