Ministrja e Kulturës, Rinisë dhe Sportit, Vlora Dumoshi ka vizituar Komunën e Rahovecit. Ajo është takuar me kryetarin e kësaj komune, Smajl Latifi me të cilin kanë biseduar për disa nga projektet kulturore-sportive që pritet të ndërtohen dhe finalizohen në këtë komunë.
Dumoshi pas takimi tha se në Rahovec po nisin projekte sportive si stadiumi sportiv në Ratkoc si dhe stadiumi i qytetit, projekte këto që kanë ndikim direkt tek nevojat e qytetarëve.
“Ne si ministri e Kulturës, Rinisë dhe Sportit në te gjitha komunat e Kosovës bashkëpunojmë, nënshkruajmë marrëveshje, memorandume që lidhen direkt ku qytetari përfiton nga projekte të tilla. Jemi në procedurë të tenderimit për dy projekte që janë të rëndësisë për Rahovecin. Për stadiumin në Ratkoc i cili është paraparë në vlerë 800 mijë euro është edhe dosja duke u përgatitur për tenderim pastaj e kemi stadionin e futbollit në qytetin e Rahovecit është i paraparë me 2 milionë edhe kjo dosje tash këto ditë do publikohet. Gjithashtu e kemi edhe ndërtimin e palestrës sportive në Krushë të Madhe”, tha Dumoshi.
Ministrja e Kulturës, Vlora Dumoshi ka folur edhe për projektin që ka të bëjë me historinë gojore për tragjeditë që ka kaluar Kosova në luftën e fundit.
Në këtë projekt do përfshihen rrëfimet e dëshmitarëve të masakrës së Krushës së Madhe.
Ajo tha se ky projekt është mbështetur edhe nga Ambasada Amerikane.
“Është një projekt i cili është i një rëndësie shumë të madhe projekti i historisë gojore, ku rrëfimet gojore të dëshmitarëve të masakrës së Krushës së Madhe. MKRS me një kujdes shumë të vecantë edhe këtë profil të mbledhjes së historisë gojore se çka ka ndodhur në Kosovë ne do i vendosim në pah dhe këto dokumente dhe libra do përkthehn edhe në gjuhë të tjera“, tha ajo.
Kurse, kryetari i Komunës së Rahovecit, Smajl Latifi tha se është i kënaqur që ministrja Dumoshi po i përkrah projektet e rëndësishme sportive e kulturore për qytetarët e kësaj komune.
“Është mirë që në këto prioritetet tona të cilat i ka komuna e Rahovecit po përfshihet jashtëzakonisht mirë dhe kënaqshëm edhe ministria e Kulturës si në projektet që kanë për qëllim me i mbështet OJQ, subjektet të cilat angazhohen dhe kryejnë projekte të shumta për rini, kulturë dhe sport po ashtu edhe projektet kapitale që janë shumë me rëndësi të madhe për qytetarin e Rahovecit si stadiumi i kategorisë se dytë sipas standardeve të FIFA-së që do fillojë së ndërtuari së shpejti. Palestra sportive në Krushë të Madhe, stadiumi i futbollit në Ratkoc”, tha ai.
Ministrja e Kulturës, Rinisë dhe Sportit, Vlora Dumushi ka vizituar hapësirën ku po planifikohet ndërtimi i stadiumit të qytetit. Ndërsa, më pas do të zhvillojë vizitë edhe në shtëpinë muze të Ukshin Hotit.
