I dërguari amerikan për Ballkanin Perëndimor Alexandar Kasanof vizitoi të martën Podgoricën ku zhvilloi takime me zyrtarët më të lartë malazezë, mes tyre Presidentin Jakov Milatoviç.

Në një njoftim të zyrës së presidentit të Mali të Zi thuhej se zoti Kasanof tha në takim se “Uashingtoni mbështet reformat që ka ndërmarrë Mali i Zi në fushën e sundimit të ligjit si dhe të tjera reforma të rëndësishme për integrimin evropian të vendit në Bashkimin Evropian.

SHBA do të vazhdojë t’u ofrojë mbështetje të plotë në këtë drejtim. Ne duam që anëtari i ardhshëm i BE-së të jetë Mali i Zi dhe kjo është arsyeja pse është thelbësore që zbatimi i reformave të mbetet përparësi”, shtoi më tej zyrtari amerikan.

Nga ana e tij Presidenti malazez Jakov Milatoviç tha se një rëndësi të veçantë merr fakti që Shtetet e Bashkuara të Amerikës të mbajnë fokusin e tyre në rajon dhe të vazhdojnë të mbështesin fuqishëm të ardhmen evropiane të Malit të Zi.

Zyrtari amerikan zhvilloi një takim edhe me Kryeprokurorin e Posaçëm të Malit të Zi Vladimir Novoviç. Në takim u fol rreth përpjekjeve për rezultate të qëndrueshme në luftën kundër krimit dhe korrupsionit në vend.

“Për arritjen e sukseseve në këtë drejtim, duhet përpjekje e vazhdueshme e të gjitha institucioneve gjyqësore si dhe mbështetja e partnerëve ndërkombëtarë”, thuhet në njoftimin e Prokurorisë.

Sipas deklaratës së prokurorisë zoti Kasanof konfirmoi mbështetjen e vazhdueshme për përpjekjet e Prokurorisë së Posaçme e strukturave të tjera në zbatimin e ligjit si dhe mbrojtjen e interesit publik.

Ai tha gjithashtu se Uashingtoni pret nga këto institucione që të “rrisin efikasitetin e përpunimit dhe gjykimit të vepra penale të rëndë e krimit të organizuar, veçanërisht ato që lidhen me pastrimin e parave”.

Mali i Zi pritet të trajtojë problemin e proceseve gjyqësore të gjata e vonesave të shpeshta në dhënien e gjykimeve në rastet që lidhen me krimin e organizuar.

Vizita e zyrtarit amerikan vjen pas më pak se një muaj pasi Mali i Zi dhe Shtetet e Bashkuara nënshkruan një memorandum në Uashington për bashkëpunim strategjik në fushën e ekonomisë, qëllimi i të cilit është forcimi i partneritetit ekonomik dhe investimeve mes të dy vendeve. /VOA