Klubi i mirënjohur prishtinas, 2 Korriku ka njoftuar se ka nisur bashkëpunimin me kampionin e Turqisë në futboll, Beshiktash.
2 Korriku përmes rrjetit social “Facebook” njofton se futbollistët nga shkolla e klubit kryeqytetas do të testohen te gjiganti turk, shkruan FrontOnline.
Ky bashkëpunim me Beshiktashin është bërë i bindur përmes Fikret Havollit.
https://www.facebook.com/FC2Korriku/photos/a.527144360765795/2623972547749622/?type=3
Njoftimi i plotë i 2 Korrikut:
“Lajm i madh për futbollin kosovar – mundësi e mirë për zhvillim
Së shpejti nis bashkëpunimi ndërmjet kampionit dhe fituesit të Kupës së Turqisë, Beşiktaş dhe Shkollës së Futbollit “2 Korriku”
Një lajm i mirë, tashmë zyrtar, është ai i arritjes së bashkëpunimit ndërmjet dy klubeve, atij turk, Beşiktaş dhe klubit nga Kosova, 2 Korriku. Ky bashkëpunim më se i nevojshëm, është shenjë e mirë se puna po shpërblehet dhe se tashmë e tëra që na mbetet është që të shfrytëzojmë mundësitë e dhëna nga ky bashkëpunim si dhe ta rrisim intensitetin e punës edhe më shumë.
Ky bashkëpunim me gjigjantin turk që ka për bashkëpuntor edhe Fikret Havollin, do të ngërthej gjëra të ndryshme në të cilat klubet respektive mund të bashkëpunojnë, siç janë: mundësia që futbollistët nga shkolla jonë e futbollit të provohen në Turqi te Beşiktaş, bashkëpunimi me trajnerë si dhe shumëçka tjetër, e tëra me qëllim që në klub të rritet profesionalizmi dhe të ecim përpara drejt sukseseve të reja në të ardhmen.
Në lidhje me këtë bashkëpunim, për faqen zyrtare të klubit, u prononcua Shaban Baholli, një nga bashkëthemeluesit e Klubit të Futbollit “2 Korriku”. Ai theksoi se: “Një lajm jashtëzonisht i mirë për ne si klub dhe shkollë futbolli është ky i bashkëpunimit me një klub të madh, me traditë e histori si Beşiktaş. Ndarja e përvojave me klube të tilla, pa dyshim se na mundëson që të përmirësohemi, të mësojmë shumë dhe të planifikojmë në mënyrë sa më të mirë planet për të ardhmen, sepse bashkëpunimet e tilla kanë për qëllim planet afatgjate, në atë mënyrë që profesionalizmi në klub të rritet dhe të arrihet niveli i dëshiruar“./FrontOnline/
