Prishtina e ka prezantuar zyrtarisht mbrojtësin Bujar Pllana në faqen zyrtare të klubit.

Pas largimit nga Feronikeli, Pllana ka vendosur t’i bashkohet kampiones në fuqi të Kosovës, raporton FrontOnline.

Mbrojtësi 20-vjeçar që ftohet vazhdimisht nga Kosova U21, ka pasur paraqitje të mira këtë edicion.

Ai i është bashkuar Prishtinës edhe në përgatitjet në Antalia të Turqisë.

Njoftimi i plotë i Prishtinës:

“Mirë se vjen Bujar Pllana!👏
FC Prishtina njofton opinionin se mbrojtësi Bujar Pllana u është bashkuar zyrtarisht kampionëve në fuqi të Kosovës, duke nënshkruar kontratë me kryeqytetasit.
Pllana është 20-vjeçar dhe luan në qendër të mbrojtjes, si dhe mbrojtës i djathtë.
Ai së fundmi ishte pjesë e Feronikelit, ekip me të cilin u nda javë më parë, pas një stinori shumë të mirë në aspektin individual.
Bujari, që është zhvilluar si futbollist te Trepça ’89, është pjesë edhe e Përfaqësueses së Kosovës U-21.
Shtatlarti (1.87) është bashkuar me ekipin në fazën përgatitore në Antalia, me ç’rast e ka dhënë një intervistë për faqen zyrtare të klubit.
𝑨𝒓𝒅𝒉𝒋𝒂 𝒕𝒆 𝑷𝒓𝒊𝒔𝒉𝒕𝒊𝒏𝒂 – Prishtina është klubi i madh dhe më me traditë në futbollin e Kosovës, andaj paraqitja në këtë fanellë është nder i madh. Nuk kam menduar shumë kur më erdhi oferta për t’iu bashkuar ekipit, sepse për mua do të thotë shumë që ta bart një fanellë të Prishtinës, e cila për për çdo lojtar është me peshë të madhe.
𝑺𝒚𝒏𝒊𝒎𝒆𝒕 – Dua që t’u premtoj trajnerëve, bashkëlojtarëve, drejtuesve të klubit dhe tifozëve se do ta japë më të mirën time që Prishtina t’i arrijë synimet e saj. Do të angazhohem maksimalisht që ta zë një vend në përbërjen bazë.
𝑨𝒎𝒃𝒊𝒆𝒏𝒕𝒊𝒎𝒊 𝒎𝒆 𝒆𝒌𝒊𝒑𝒊𝒏 – Në ekip më kanë pritur shumë mirë. Atmosfera në skuadër është tejet pozitive dhe e kam gjetur një grup shumë të mirë. Tani në Antalia po punojmë dhe angazhohemi maksimalisht që për pranverë të jemi sa më të përgatitur“./FrontOnline/