Mbledhja e cila ishte paraparë të mbahej më 20 Prill 2023 u shtye për një datë tjetër.

Bordi i Zyrës së Rregullatorit të Energjisë (ZRRE), në këtë mbledhje kishte paraparë të shqyrtojë shumë pika.

Por, ndër pikat që vlen të ceket ishte shqyrtimi/vlerësimi i propozimit për masë administrative dhe gjobë për KEK SH.A., dhe shqyrtimi/vlerësimi i propozimit për masë administrative  dhe gjobë për KOSTT SH.A.

Front Online merr vesh se gjoba ndaj Korporatës Elektroenergjetike të Kosovës(KEK) ka të bëjë me dyshimet se KEK-u ka bërë tregti të energjisë me kompani që nuk janë të licencuara.

ZRRE-ja nuk ka treguar arsyen se përse e ka shtyrë mbledhjen, por dështimi i saj ndodhi një ditë pas 19 Prillit kur me urdhër të Prokurorisë Speciale u arrestua kryeshefi ekzekutiv i KEK-ut, Nagip Krasniqi.

Krasniqi është akuzuar për shkak të dyshimit të bazuar se i njëjti ka kryer veprat penale “Keqpërdorimi i pozitës apo autoritetit zyrtar” nga neni 414 paragrafi 2 lidhur me paragrafin 1 të KPRK, “Ushtrimi i ndikimit” nga neni 424 paragrafi 1 të KPRK-së dhe veprën penale “Konflikti i interesit’’ nga neni 417 paragrafi 2 lidhur me paragrafin 1 të KPRK-së.

Ndërsa, gjatë bastisjeve janë sekuestruar dokumente të ndryshme që ndërlidhen me rastin, përfshirë tre kompjuterë, një llaptop, një celular dhe një USB, në cilësi të provave materiale që do të shërbejnë për procedurën e mëtejme.

Front Online për këtë çështje ka kërkuar përgjigje edhe në Zyrën e Rregullatorit të Energjisë nëse shtyrja e mbledhjes se mos gjobitja e KEK-ut lidhet me arrestimin e Nagip Krasniqit.

Nga ZRRE-ja nuk e treguan arsyen, por thonë se për mbajtjen e mbledhjes do të njoftohet publiku me kohë, duke mos treguar se për cilën datë është shtyrë.

“Siç ju kemi informuar, mbledhja e Bordit e datës 20 prill 2023 është shtyrë për një datë tjetër. Mbledhjet e Bordit janë të hapura për publikun. Në lidhje me mbajtjen e mbledhjes së Bordit, publiku do të njoftohet me kohë siç parashihet me dispozitat ligjore të Ligjit për Rregullatorin e Energjisë”, thuhet në përgjigjen e ZRRE-së, për Front Online.

Front Online gjithashtu ka pyetur ZRRE-në se cilat janë kompanitë që dyshohen për tregti të pa licencuar të rrymës dhe sa pritet të jetë gjoba por të njëjtit japin një përgjigje krejt tjetër.

 “Sa i përket raportit të monitorimit  për Korporatën Elektroenergjetike (KEK) dhe Operatorin e Sistemit të Transmetimit dhe Tregut (KOSTT) , ju informojmë se Raportet së bashku me përgjigjet e dhëna ndaj gjetjeve gjatë fazës së monitorimit do të shqyrtohen nga Bordi në mbledhjen e radhës të Bordit. Në përputhje me dispozitat ligjore dhe afatet kohore, pas shqyrtimit të raportit nga Bordi, raporti do te publikohet në faqen zyrtare të ZRRE-së”, thuhet më tutje në përgjigjen e ZRRE-së, për Front Online.

Më 20 prill Gjykata Themelore e Prishtinës ia ka caktuar një muaj paraburgim kryeshefit të KEK, Nagip Krasniqi./Front Online