Zyra e Rregullatorit për Energji ka lëshuar një njoftim për rritjen e tarifave të reja të energjisë elektrike në Kosovës dhe “ndikimin te konsumatorët në veri”.

ZRRE thotë se më 16 prill ka aprovuar tarifa të reja për shfrytëzim të sistemit të transmetimit, operimit të sistemit dhe operimit të tregut si dhe tarifa për shfrytëzim të sistemit dhe shpërndarjes, të cilat tash thotë se “janë të detyrueshme për të gjithë furnizuesit”, përfshirë Elektroseverin, kompaninë serbe që operon në veri të vendit.

“Rritja e tarifave të energjisë elektrike dhe ndikimi te konsumatorët në veri Zyra e Rregullatorit për Energji (ZRRE) njofton opinionin publik se Bordi i ZRRE me datë 16.04.2025 ka aprovuar edhe Tarifat për Shfrytëzimin e Sistemit të Transmetimit, Operimit të Sistemit dhe Operimit të Tregut, si dhe Tarifat për Shfrytëzimin e Sistemit të Shpërndarjes, të cilat tarifa janë të detyrueshme për të gjithë Furnizuesit e energjisë elektrike në tërë territorin e Republikës së Kosovës, përfshirë edhe Furnizuesin e energjisë elektrike Elektrosever”, thuhet në njoftim.

“Rritja e tarifave të energjisë elektrike 16.1% vlen për Furnizuesin me Shërbim Universal, që operon në të gjithë territorin e Republikës së Kosovës dhe këtë obligim të shërbimit universal e ka KESCO”, thuhet në njoftimin e ZRRE-së.

Më herët sot, ZRRE ka thënë se tarifat e reja do të zbatohen nga 1 qershori në të gjithë territorin, përveç pjesës veriore. Atje kompania serbe Elektrosever e ka marrë përsipër furnizimin dhe faturimin e konsumatorëve, sipas një marrëveshjeje të arritur në kuadër të dialogut Kosovë-Serbi në vitin 2022 dhe meqenëse ajo operon jashtë sistemit të Furnizuesit me Shërbim Universal ZRRE ka thënë më herët se “këto tarifa nuk zbatohen në atë pjesë të territorit”.