Krejt muhabetet tjera i ka lënë anash, të martën.

Për Kadri Restelicën, asgjë më me rëndësi, në këtë ditë të 3 nëntorit, nuk ka sesa zhvillimet në zgjedhjet presidenciale që po mbahen në Amerikë.

Plaku 73 vjeçar i cili që dy dekada jeton përtej Atlantikut, nuk e shfrytëzoi të drejtën e votimit, meqë erdhi për pushime në Kosovë.

Por, po të ishte atje, votën, do t`ia jepte kandidatit republikanin Donald Trump më parë sesa atij demokrat, Joe Biden.

“Tanë të mirë janë. Krejt për Kosovën janë të mirë. TaniTrumpit. Trumpi ka punuar goxha mirë kohëve të fundit”, tha ai për Front Online.

E ka diçka që u bë sebep për këtë.

“Trumpi ka punuar që e bëri këtë marrëveshjen mes Kosovës dhe Serbisë. Mirë e bëri”, u shpreh ai për Front Online.

Pavarësisht se kush e merr timonin në krye të Shtëpisë së Bardhë, ky, pritshmëritë nga dy kandidatët i ka të njëjta.

“Na jep njohjen e pavarësisë prej Serbisë. Bën presion më shumë”.

Më fort se Trumpin, Bidenin e gjithë të tjerët politikanë, Restelica e ka në qejf, një ish-president amerikan që bëri shumë për Kosovën.

“Atë e kam deshtë fortë, Geroge Bushin e dytë. E kam deshtë fortë atë. E kom deshtë vetë se u kanë i çelur. U kanë republikan, po u kanë demokrat me krejt popullin”.

Kadriu jeton me gruan dhe katër fëmijët e tij në shtetin Masachuets të Amerikës.

Këtu e në gjithë vendin, sipas tij, shqiptari është i barabartë më amerikanin.

“Të drejtat i kemi si amerikanët, si na. Tonat i kemi. Ai që don me punu e mu shkullue të drejtat i ka të barabarta si amerikani”, thotë ai.

Zgjedhjet e sivjetme Presidenciale në Amerikë po konsiderohen si më të rëndësishmet në historinë moderne të këtij kontinenti.