Kuvendi i Lidhjes Demokratike të Kosovës (LDK), më 19 nëntor zgjedh kryetarin e ri të kësaj partie.

Subjekti më i vjetër në Kosovë, deri tani zyrtarisht ka vetëm një kandidat për kryetar, që është Lumir Abdixhiku.

Kjo u konfirmua edhe nga nënkryetarët e LDK-së.

Anton Quni: Nuk kandidoj për kryetar të LDK-së

Anton Quni, që në zgjedhjet e kaluara hoqi dorë në momentin e fundit nga kandidatura, këtë herë nuk do të kandidoj për t’i prirë LDK-së.

Ai në një përgjigje për Front Online tha se Lumir Abdixhiku do të rizgjedhet për një mandat të plotë.

“Jo, unë nuk kandidoj. Ende askush nuk ka shpallë kandidaturë. Por, supozoj se z. Abdixhiku do të kandidoj dhe do të rizgjedhet për një mandat të plotë”, deklaroi nënkryetari i LDK-së, Anton Quni për Front Online.

Ani pse thotë që deri tani vetëm Abdixhiku është kandidat, një bashkë partiak i tij thotë se do të kandidojë për kryetar.

Imri Ahmeti: Faton Bislmi s’është delegat, s’mund të kandidoj për kryetar të LDK-së

Faton Bislimi ka njoftuar se do të kandidoj për kryetar të Lidhjes Demokratike të Kosovës.

Bislimi ka thënë se ka njoftuar Kryesinë e LDK-së në Prishtinë, përmes një shkrese zyrtare, se ka vendosur që në Kuvendin e Dhjetë të LDK-së më 19 nëntor ta paraqesë kandidaturën.

Mirëpo, një gjë të tillë, Quni thotë se e ka marr vesh vetëm përmes mediave.

“Jam njoftu nga mediat qe z. Bislimi e ka shpreh gatishmërinë për t’u zgjedhur kryetar i LDK-së”, deklaroi ai.

Të njëjtën thotë edhe sekretari i LDK-së, Imri Ahmeti.

Ai për Front Online mohon deklaratën e Bislimit, se e ka njoftu kryesinë për kandidatin për kryetar.

Ahmeti thotë se Bislimi vetëm e ka kërkuar një listë të delegatëve, por që sipas tij, kjo është jashtë ligjit.

“Jo nuk janë në dijeni që është njoftuar kryesia, unë e di që ai ka kërkuar një listë të delegatëve të Kuvendit, me numra personal që është në kundërshtim me ligjin për mbrojtjen e të dhënave dhe ne nuk iu kemi përgjigj akoma, sepse dje në orët e pasdites ai e ka bërë këtë, sido që të jetë është vullnet i tij, por duhet t’i nënshtrohet procedurave”, thotë Ahmeti.

“Faton Bislimi nuk është delegat në Kuvendin e LDK-së”,  thotë sekretari Imri Ahmeti.

Ai thotë se Bislimi ka dhënë dorëheqje edhe nga Këshilli i Përgjithshëm.

Por, nuk përjashton mundësinë që delegatët ta nominojnë.

“Për sa e di unë Faton Bislimi ka deponuar dorëheqje me shkrim e të qenurit anëtarë dhe i Këshillit të Përgjithshëm dhe fakti tjetër, për sa e di unë ai nuk është delegatë fare në Kuvend, e në Kuvend marrin pjesë vetëm delegatët. Mund të ketë grup të delegatëve që e mbështesin dhe mund të kenë aty për aty nominime, është e drejtë e delegatëve të Kuvendit për të nominuar këdo që ata mendojnë”, u shpreh ai.

Gazmend Muhaxheri tregon nëse do t’i hyjë garës për kryetar të LDK-së

Portali Front Online ka kontaktuar edhe nënkryetarin e kësaj partie, Gazmend Muhaxheri, nëse do të kandidoj për kryetar të LDK-së, mirëpo ai e mohoi.

Muhaxheri thotë se në çdo moment mund të ketë kandidat tjerë.

“Jo valla unë jo. Nuk e di deri në Kuvend mundet me i ndërru mendja ndokujt me konkurru, por njëherë për momentin nuk e di. Deri tani është kandidat vetëm zotëri Abdixhiku”, u shpreh ai.

Në zgjedhjet e fundit, Lumir Abdixhiku, u zgjodh kryetar i LDK-së, i cili kishte përballë edhe dy kandidatë tjerë për kryetar të LDK-së, nënkryetarin, Lutfi Haziri dhe anëtarin e kryesisë, Besian Mustafën.

Front Online ka provuar gjatë ditës të marr edhe një deklaratë të Faton Bislimit, por ai nuk i është përgjigjur thirrjeve telefonike./FrontOnline