Ky është shansi jonë i fundit. Kjo ishte fjalia më e zakonshme që është dëgjuar nga qytetarët e Kosovës para dhe gjatë fushatës së zgjedhjeve të fundit parlamentare të mbajtura më 14 shkurt 2021, prandaj pritjet e qytetarëve nga Albin Kurti dhe Vjosa Osmani janë shumë të mëdha, më të mëdha se ndaj çdo politikani tjetër deri më tani.
Kështu ka deklaruar të mërkurën Visar Ymeri, drejtor ekzekutiv në Institutin “Musine Kokalari” në Prishtinë, në uebinarin e organizuar nga European Endowment for Democracy (EED) me seli në Bruksel, ku morën pjesë pjesë deputetët e Parlamentit Evropian, Viola von Cramon dhe Lukas Mandl, si dhe përfaqësuesit nga Kosova (Vlora Çitaku, ish-ambasadore e Kosovës në Washington, Lavdim Hamidi, kryeredaktor i Front Online, Jovana Radosavljeviq nga Iniciativa e Re Sociale nga veriu i Kosovës), raporton portali “Front Online”.
Për ish-bashkëpartiakun e tij, Albin Kurtin, Ymeri thotë se ka qenë i suksesshëm, siç thotë ai, në konstruktimin e të vërtetës së thjeshtë për ate se çka po ndodhë në Kosovë.
“Njëzet vitet e pasluftës janë thjeshtësuar në një fjali të vetme se korrupsioni nuk po na lejon të zhvillohemi dhe se është pengesë e madhe. Edhe pritjet e qytetarëve janë ndërtuar në mënyrën që luftimi i korrupsionit është një mundësi për më shumë vende pune, më shumë zhvillim, liberalizim të vizave, arsim dhe shëndetësi më të mirë. Por, problemi qëndron këtu se ky thjeshtësim i së vërtetës, kurrë nuk është i vërtetë. Edhe nëse kjo është e vërtetë, kufizimet kohore mund të jenë më të gjata se pritjet e qytetarëve”, shprehet Ymeri.
Ai thotë se më 14 shkurt është mbyllur një kapitull i së kaluarës dhe është hapur një kapitull i ri, pasi që, siç thotë Ymeri, votuesit deshën të largohen nga jo se çka kanë parë deri më tani në Kosovë.
“Thjeshtë votuesit deshën që të largohen nga ajo se çka kanë parë deri më tani: korrupsion, nepotizëm, keqpërdorim, krim të të organizuar dhe shumë dështime tjera në shtetin e Kosovës, sidomos nga PDK-ja dhe LDK-ja”.
Përkundër fitores prej rreth 50% në zgjedhjet e 14 shkurtit, Ymeri thotë se në gjysmën e parë të muajit të kaluar pamë më shumë një votë ndëshkuese për partitë tradicionale në Kosovë dhe jo domosdoshmëritë një votë fitoreje për Albin Kurtin dhe Vjosa Osmanin.
Për ish-liderin e Lëvizjes “Vetëvendosje”, pasardhësin e tij në këtë subjekt politik dhe pretendentin kryesor për ta drejtuar Qeverinë e re të Kosovës e presin disa sfida, mes të cilave sigurimin e disa votave nga minoritetet për ta formuar Qeverinë, pasi që partia më e madhe në vend nuk do t’i ketë më shumë se 58 vota, përderisa pengesa tjetër është zgjedhja e presidentit.
Nëse këto pengesa tejkalohen dhe formohen institucionet, Ymeri thotë se Qeveria e re duhet të merret me pasojat e pandemisë COVID-19, si në aspektin shëndetësor, ashtu edhe në atë ekonomik, dialogun me Serbinë, raportet me minoritetet, etj.
/Front Online/
Video:
