Deputeti i PDK-së, Xhavit Haliti , njëherë anëtar i Komisionit për Punë të Jashtme, për FrontOnline e ka vlerësuar të rrezikshme deklaratën e kryeministrit Albin Kurti se Qeveria nuk e pranon kushtëzimin e anëtarësimit në KiE me Asociacion, kërkesë kjo e bashkësisë ndërkombëtare para anëtarësimit të Kosovës në Këshillin e Evropës.
Haliti, konsideron se Kosova duhet të ecë nga ‘’rrjedhja e ujit’’ dhe jo dike tjetër dhe se qëndrimet kundërshtuese ndaj SHBA-së dhe partnerëve të tjerë, janë veprime që dërgojnë ‘’ujë në mullirin e Serbisë’’.
”Mendoj se ne duhet të ecim nga rrjedhja e ujit dhe jo dike tjetër, andaj qëndrimet kundërshtuese ndaj SHBA-së, për mua janë ujë në mullirin e Serbisë dhe janë të rrezikshme dhe janë të dyshimta. Kështu ai (Albin Kurti) mundet të mendoj në kokën e vetë’’ thotë ai.
Tutje ai thotë se për të fituar përkrahjen e ndërkombëtareve kanë bërë shumë mund dhe sakrifice dhe tash po del një kryeministër në kundërshtim të të gjitha opsioneve ndërkombëtare.
‘’Ne që kemi qenë në proces dhe i kemi bërë argat këtij vendi dhe me mund kemi arritur të fitojmë mbështetjen ndërkombëtare dhe ta fusim bashkësinë ndërkombëtare në mbështjetjen tonë, ti bindim ata dhe tash një kryeministër del në kundërshtim në të gjitha opsionet e mundshme që i jep përendimi, kjo shkon në apetitet e tij personal’’ thekson Haliti.
Deputeti Haliti shton se ky është gabim shumë i rëndë për Kosovën dhe po i jep hapësirë Serbisë kundër Kosovës.
‘’Ky do të ishte një gabim tepër i rëndë, në të cilin po e futë Kosovën dhe po i gjen rrugë dhe hapësirë Serbisë kundër Kosovës dhe planet të cilat po ashtu i ka edhe Rusia për me e destabilizua Ballkanin. Ne nuk po e fusim Kosovën në KiE por Këshilli i Ministrave vendos a e fut a jo Kosovën në KiE, prandaj detyrat e Qeverisë dhe detyrat e Albinit janë me i përmbushë gjitha kushtet që i ka dhënë KiE dhe Bashkimi Evropian’’ përfundon Haliti për FrontOnline.
