Nepotizmin, fjalët në fushata të kësaj partie ishin se “kushërinjtë janë për dasma, jo për ministri”.

Hiç më larg se të martën, Qeveria Kurti emëroi drejtori Ekzekutiv të Agjensionit të Menaxhimit të Emergjencave, Genc Metaj i cili është vëllai i deputetes së “Lëvizjes Vetëvendosje”, Shqipe Metaj.

Front Online ditë më parë kishte raportuar se si Ministria e Punëve të Brendshme po tentonte ta vendos në këtë pozitë vëllain e deputetes së VV-së, përmes konkursit.

Lekaj: Familjarët e zyrtarëve të VV-së “nga dasmat u punësuan në Ministri”

Deputeti i “Aleancës për Ardhmërinë e Kosovës”, Pal Lekaj ka deklaruar se premtimet e Qeverisë Kurti në fushata ishin për vota.

Lekaj tha për “Front Online” se pushteti aktual po e bënë të kundërtën e premtimeve.

“Punësimi i vëllait të deputetes së VV është rast ironik duke marrë parasysh premtimet e tyre të forta kur ishin në opozitë, ku thoshin se “Kushërinjtë janë për dasma, jo për Ministri.” Tani duket qartë se këto fjalë ishin thjesht për të fituar vota, ndërsa në pushtet po bëjnë të kundërtën”, thotë Lekaj.

Lekaj thotë se përdorja e procesit në prokurim për t’i shpërblyer të afërmit me pozita, tregon dështimin e Qeverisë.

“Kjo tregon një dështim moral dhe etik të Qeverisë, që po përdor procesin e rekrutimit dhe emërimeve nëpër institucione për t’i shpërblyer të afërmit e figurave të partisë. Kjo nuk është asgjë më shumë se një formë e qartë e nepotizmit dhe klientelizmit”, thotë Lekaj.

Shatri: “Vetëvendosja” me përralla parazgjedhore mashtroi votuesit

Ish-ministri i Financave, Haki Shatri ka kritikuar pushtetin aktual se ka shkelur premtimin për mos punësimin e familjarëve në institucione.

Shatri thotë për “Front Online” se me këtë premtim “Vetëvendosja” ka bërë humor për ta fituar pushtetin.

Tutje, Shatri tha se votuesit pushteti aktual janë të zhgënjyer.

“Nepotizmi nuk është i mirë për shoqërinë. Me premtimin që s’kanë me i punësuar familjarët kanë bërë humor për me marr pushtetin tani me i ndërruar fjalët. Ato kanë qenë përralla parazgjedhore, ju ka ardh dita le të shfrytëzojnë. Votuesit janë të zhgënjyer me këtë qeveri se këta kanë bërë ndryshime për të keq”, u shpreh Shatri.

Shala i PSD-së: VV-ja u jep vlerë aferave korruptive dhe i interpreton si meritokraci

Anëtari i kryesisë së PSD-së, Azdren Shala, ka folur për “Front Online” lidhur me punësimet familjare gjatë qeverisjes Kurti.

Shala ka deklaruar se VV ndryshe nga partitë e tjera iu jep vlerë aferave korruptive.

Sipas Shalës, pushteti aktual po e legjitimon edhe korrupsionin.

“Nga qeveritë e kaluara këta nuk dallojnë në qasje, por janë më totalitar dhe korrupsion do të shohim më shumë. Dallimi është se qeveritë tjera janë munduar ta fshehin, ndërsa partia në pushtet edhe aferave korruptive iu japin vlerë duke na i interpretuar si meritokraci e atyre që përfitojnë nga nepotizmi. Me fjalë tjera kjo qeveri po e legjitimon edhe korrupsionin”, deklaroi Shala.

Përndryshe, mediet në Kosovë vazhdimisht kanë raportuar për punësimet e familjarëve të zyrtarëve të lartë të VV-së nëpër institucionet qendrore dhe lokale. Përderisa rastet e tilla janë shpeshtuar muajtë e fundit, në fund të mandatit 4-vjeçar të Qeverisë “Kurti” dhe në prag të zgjedhjeve të reja parlamentare që do të mbahen më 9 shkurt 2025./Front Online