Lëvizja Vetëvendosje në Deçan ka dorëzuar zgjerimin e padisë kundër Ministrisë së Ekonomisë dhe Ambientit për shkak të lëshimit të lejes ujore për hidrocentralin e tretë të Kelkosit.

VV-ja shkruan se Gjykata Themelore në Prishtinë pritet të merr vendim për pezullimin e lejes dhe licencave për hidrocentralet Bellaja, Deçani dhe Lumbardhi II.

“Gjykata Themelore në Prishtinë pritet të marrë vendim këto ditë për të pezulluar lejet dhe licencat për hidrocentralet Bellaja, Deçani dhe Lumbardhi II, të cilat po shterin lumin, po shkatërrojnë mjedisin dhe po lënë vendin pa ujë”, thuhet në njoftimin e VV-së, dega Deçan.

“Aktivistët e Lëvizjes shpejt do t’u paraqesin autoriteteve edhe kallëzim penal për shkeljet e rënda të vendimmarrësve. Lëvizja Vetëvendosje nuk bën asnjëherë kompromis mbi shtetin e së drejtës”, thuhet tutje.