I dërguari special i BE-së për dialogun Kosovë-Serbi, Peter Sorensen sot e ka takuar Vuçiqin në Beograd.

Vuçiqi ka deklaruar se takimi i parë me Sorensenin “ishte i hapur dhe i drejtë”.

“E njoftova me problemet me të cilat ballafaqohet “populli ynë” në Kosovë. Shpreha shqetësimin e veçantë për pozitën e vështirë të serbëve në Kosovë për shkak të veprimeve të shumta të përshkallëzuara, të njëanshme dhe të dhunshme nga Prishtina. Theksova gjithashtu pengesat e vazhdueshme që po kryen Prishtina në procesin e dialogut dhe ritheksova se formimi i Asociacionit është parakusht për fillimin e normalizimit thelbësor të marrëdhënieve”, ka shkruar Vuçiqi në Instagram dhe ka shtuar.

“Theksova pritjen se BE-ja do të rrisë angazhimin e saj dhe do të mbajë një rol të paanshëm në këtë proces. Përsërita qëndrimin e Serbisë se vetëm dialogu konstruktiv dhe zgjidhjet kompromisi mund të kontribuojnë për paqen dhe stabilitetin afatgjatë në Ballkanin Perëndimor”, ka përfunduar Vuçiqi.

Ai si zakonisht, nuk tregon se çfarë i ka thënë Sorenseni në lidhje me këto çështje.

Vizita e Sorensenit në Serbi pason pas vizitës së tij Kosovë javën e kaluar.