×
  • Lajme
  • Lajme

    Vogel: Për sa kohë BE-ja dhe SHBA-ja e ‘ledhatojnë Vuçiqin’, Kosova do të jetë në rrezik

    FrontOnline
    21 Janar 2025

    Bashkëpunëtori i Këshillit për Politikat e Demokratizimit në Bruksel, Toby Vogel foli mbi zhvillimet e fundit në dialogun mes Kosovës dhe Serbisë.

    Ndërsa dialogu ka ngecur dhe ndodhet në një ngërç politik, Vogel theksoi rolin e Bashkimit Evropian dhe Shteteve të Bashkuara në këtë proces, si dhe ndikimin e ndryshimeve të fundit në udhëheqjen e BE-së.

    Tani më janë gjetur zëvendësuesit e Joseph Borrell dhe Miroslav Lajçak.

    Estonezja Kaja Kallas do të jetë Përfaqësuese e lartë e Bashkimit Evropian për politikë të jashtme dhe siguri. Ajo konsiderohet kritike e madhe e Rusisë, mbështetëse e vazhdueshme e Ukrainës, dhe përkrahëse e idesë që e ardhmja e Ballkanit Perëndimor është në Bashkimin Evropian.

    Ndërkaq, diplomati nga Danimarka, Peter Sorensen, pritet të jetë përfaqësues i posaçëm për dialogun mes Kosovës dhe Serbisë. Sorensen ka përvojë të gjatë diplomatike në strukturat e BE-së. Ai aktualisht është Këshilltar i lartë në Shërbimin e Veprimit të jashtëm të BE-së (EEAS) për diplomaci digjitale.

    Vogel konsideron se edhe me këto ndryshime nuk priten shumë rezultate, kjo pasi shton se duhet fillimisht të ndryshojë politikat aktuale të Bashkimit Evropian.

    “Ndryshimi i përfaqësueseve të BE-së pa ndryshuar politikën nuk do të zgjidhë shumë çështjen e dialogut. Ndërsa emërimi i Miroslav Lajçak kishte qenë një gabim, jo ​​vetëm sepse ai vinte nga grupi i vogël i shteteve anëtare jo-njohëse të pavarësisë së Kosovës. Problemi me dialogun shkon shumë më thellë sesa thjesht kush e menaxhon atë. Kam shumë shpresë që Kallas dhe ekipi i saj po e vlerësojnë çështjen nga të gjitha këndvështrimet dhe me një mendje të hapur”, thotë ai.

    Më tej, Vogel shtoi se Kosovës nuk i duhet status quo-ja, pasi është e paqëndrueshme për arsye politike dhe sigurie.

    Lidhur me neutralitetin e qëndrimeve ndërkombëtare karshi Kosovës dhe Serbisë, ai hodhi kritika të ashpra ndaj BE-së dhe SHBA-së.

    “Për sa kohë që BE-ja dhe SHBA-ja e mbajnë mbështetjen e tyre për Vuçiqin, Kosova do të jetë në rrezik. Dhe nuk shoh asnjë indikacion deri më tani se fiksimi i Perëndimit ndaj Beogradit dhe Vuçiqit mund të ndryshojë”, tha ai.

    I pyetur nëse gjatë këtij mund të ketë normalizim të marrëdhënieve ndërmjet Kosovës dhe Serbisë, Vogel u shpreh skeptik.

    “Pa një ndryshim thelbësor në qasjen e Perëndimit ndaj kësaj çështjeje, nuk e shoh që të ndodhë. Prej shumë vitesh, Brukseli dhe Uashingtoni kanë krijuar një situatë në të cilën Beogradi nuk ka asnjë shtysë për kompromis, dhe si rrjedhojë nuk ka një nxitje të tillë as për Prishtinën”, shprehet ai.

    Ndërsa Kosova përgatitet për zgjedhjet parlamentare më 9 shkurt, Vogel sugjeron se qeveria e ardhshme duhet të kërkojë marrëdhënie më të mira me aleatët perëndimorë, por vëren se ndryshimi i qasjes perëndimore është i vështirë.

    Duke folur për Asociacionin, Vogel tha se ndër vite ka ndryshuar rruga e asaj çfarë ishte synuar “normalizimi i marrëdhënieve” mes dyja shteteve.

    “Asociacioni u ra dakord në një mjedis shumë të ndryshëm, kur fokusi i dialogut ishte pa mëdyshje në qëllimin përfundimtar të “normalizimit”. Vitet e fundit, ky qëllim përfundimtar është lejuar të zhvendoset në një distancë të largët, dhe si rezultat nuk ka pasur lëvizje”, deklaroi Vogël.

    Nga Rubrika
    Lajme09 Shkurt 2025
    Web faqja e Komisionit Qendror të Zgjedhjeve po ka vështirësi në funksionimin e saj. Ajo nganjëherë nuk po hapet e nganjëherë nuk...
    Lajme09 Shkurt 2025
    Albert Krasniqi nga Demokracia në Veprim ka deklaruar se nga rezultatet e Exit Poll-ve të publikuara në mediat kosovare del se asnjë...
    Lajme09 Shkurt 2025
    Komisioni Qendror i Zgjedhjeve (KQZ), ka numëruar 5.29% të votave. Sipas këtyre rezultateve, në Mitrovicë Lëvizja Vetëvendosje ka 55.66% të votave  ...
    Të tjera
    Lajme09 Shkurt 2025
    Policia e Kosovës ka dalë me komunikatë për media për mbarëvajtjen e procesit të zgjedhjeve parlamentare në Kosovë. Siç thotë Policia, “Plani...
    Lajme09 Shkurt 2025
    Menjëherë pas mbylljes së vendvotimeve në orën 19:00, ka filluar numërimi i votave, tha në një konferencë për media zëdhënësi i Komisionit...
    Lajme09 Shkurt 2025
    Zëdhënësi LDK-së, Besian Mudtafa ka dalur në një konferencë për medie nga ku ka thënë se nga të dhënat e fundit preliminar...
    Lajme09 Shkurt 2025
    Komisioni Qendror i Zgjedhjeve ka njoftuar se sipas të dhënave preliminare dalja e qytetarëve në zgjedhjet paralamentare 2025 ka qenë mbi 40%....
    Lajme09 Shkurt 2025
    Gjatë fushatës zgjedhore, katër kandidatët për kryeministër kanë folur për mundësinë e lidhjes së koalicioneve paszgjedhore. Disa prej tyre kanë mohuar mundësinë...
    Lajme09 Shkurt 2025
    Kryetari i Aleancës për Ardhmërinë e Kosovës (AAK), ka thënë se opozita i ka fituar zgjedhjet. Ai tha se rezultati i AAK-së...

    FrontOnline, © 2025 Të gjitha të drejtat e rezervuara.