Ushtruesja e detyrës së presidentit Vjosa Osmani, dje gjatë ditës ka njoftuar se ka dalë pozitiv me COVID-19.

Osmani, bëri të ditur se për një kohë do të qëndrojë e izoluar shkaku i infektimit me koronavirus.

Por, ajo theksoi se asnjë që lidhet me funksionet e saj, nuk do të mbetet pa mbulim.

Për  gjendjen e saj shëndetësore ka pyetur edhe Klan Kosova.

Këshilltari për media Bekim Kupina, tha se ushtruesja e detyrës së presidentit po i vazhdon aktivitetet e parapara, vetëm se ato janë bartur online.

Kupina njoftoi se gjendja shëndetësore e e Osmanit është stabile, njofton Klan Kosova.

“Siç e ka bërë të ditur në postim u.d. Presidentja Osmani, gjatë periudhës sa do të qëndrojë e izoluar shkaku i infektimit me COVID-19, asnjë çështje që lidhet me funksionet që bartë ajo  nuk do të mbetet pa mbulim”.

“Kabineti në Presidencë, sikurse edhe ai në Kuvend vazhdojnë punën, ngase një pjesë e ekipit tashmë e kanë kaluar përballjen me COVID-19. U.D.Presidentja po i vazhdon të gjitha takimet e planifikuara, vetëm se i ka bartur ato në platforma elektronike. Gjithashtu po vazhdon t’i shqyrtojë e nënshkruaj me kohë të gjitha dokumentet e kërkuara për të dy funksionet që i ushtron”.

“Pra, u.d.Presidentja është në gjendje stabile shëndetësore dhe po vazhdon t’i kryejë obligimet kushtetuese”.