Charles Kupchan, ish-këshilltar për politikën e jashtme në administratat e Bill Clinton dhe Barack Obama, i ftuar në A2 CNN, komentoi rrezikun e mundshëm që mund t’i kanoset Shqipërisë nga Irani për shkak të strehimit të opozitës iraniane.
Kupchan theksoi se, në klimën aktuale të tensioneve, vigjilenca duhet të jetë e përgjithshme për të gjitha vendet evropiane, jo vetëm për Shqipërinë. Sipas tij, shumë qeveri e konsiderojnë regjimin në Teheran si destabilizues dhe me pak mbështetje ndërkombëtare.
Ai shtoi se një ndryshim regjimi në Teheran do të përmirësonte sigurinë në Lindjen e Mesme dhe në nivel global.
Duke iu referuar Shqipërisë si anëtare e NATO-s, Kupchan sugjeroi që Tirana të mbajë një qëndrim të kujdesshëm, të koordinuar me aleatët dhe të kontribuojë në mënyrë mbështetëse për një zgjidhje pozitive të konfliktit.
Deklaratat e tij vijnë në një kohë kur tensionet në Lindjen e Mesme kanë rritur shqetësimet për sigurinë, përfshirë edhe për vende të vogla, por me rol strategjik si Shqipëria.
