Dy persona kanë mbetur të plagosur dje pas mesnate, pas disa të shtënave me armë, në rrugën “Evlia Çelebia” në Mitrovicë.
E si pasojë e plagëve të marra, viktima me inicialet D.S, 49 vjeçar ka vdekur.
Lajmin për FrontOnline e ka konfirmuar zëdhënësi i Policisë për Rajonin e Mitrovicës, Avni Zaiti.
“Ndërsa rreth orës 02:00, nga autoritetet spitalore është raportuar se njëri nga të plagosurit, viktima D. S., 49 vjeçar, si pasojë e plagëve ka vdekur, ndërsa i plagosuri tjetër viktima J. S., 52 vjeçar, mbetet në tretman të mëtejmë mjekësor”, ka thënë Zaiti, për FrontOnline.
Sipas tij, pas ekzaminimeve të kryera në vendin e ngjarjes, hetuesit e krim-teknikës si prova materiale kanë gjetur katër (4) gëzhoja dhe një predhë të plumbit si dëshmi materiale që ndërlidhen me rastin.
“Nga hetimet e deritanishme dhe dyshimet e ngritura, dy persona të dyshuar janë në kërkim policor identiteti i të cilëve tashmë është i njohur për policinë”, ka shtuar ai.
Zaiti ka deklruar se rrjedha hetimore është duke vazhduar në drejtim të arrestimit të personave të dyshuar si dhe zbardhjes së të gjitha rrethanave që ndërlidhen me rastin e veprës penale vrasje e rëndë.
Ndërsa, trupi i pajetë i viktimës është dërguar për obduksion në IML./FrontOnline
