Në përpjekje për të tejkaluar krizën politike dhe për të zhbllokuar funksionimin e Kuvendit të Kosovës, Presidentja Vjosa Osmani ka mbledhur të enjten e kaluar në takim liderët e partive politike.

Por, as pas takimit të presidentes me liderët politik nuk është shënuar ndonjë përparim për zhbllokimin e ngërçit politik.

Osmani para mediave bëri të ditur se në takimin e mbajtur me liderët e partive kryesore politike iu ka kërkuar që të gjejnë zgjidhje të përbashkët për konstituimin e Kuvendit, derisa tha se javën tjetër do t’i ftoj në takim veç e veç liderët.

“Ekziston një disponim minimal. Kishte dialog politik e të ndërsjellët. I kam inkurajuar liderët e partive politike të gjetjen e një zgjidhje të përbashkët për konstituimin e kuvendit”, u shpreh Osmani.

Takimi erdhi dy ditë para seancës së radhës së Kuvendit, për të cilën ende nuk është e qartë nëse do të sjellë ndonjë ndryshim në qëndrimin e partive politike.

Nga Lëvizja “Vetëvendosje” nuk pritet ndryshim, derisa kanë kritikuar PDK, LDK e AAK për bllokim të Kuvendit. Në anën tjetër, nga partitë opozitare faji është hedhur tek partia e Albin Kurtit, për ngërç politik, ku nuk presin asnjë hap ndryshe në seancën e radhës së Kuvendit.

Deputeti i VV-së: PDK, LDK dhe AAK po duan ngërçin e Kuvendit ta mbajnë deri në zgjedhjet lokale

Deputeti i Lëvizjes “Vetëvendosje”, Halil Thaçi është shprehur për “Front Online” se Vetëvendosje po angazhohet për zhbllokim, ndërsa fajësoi partitë opozitare për bllokim të Kuvendit.

Sipas tij, opozita synon ta mbajë vendin të paralizuar deri në zgjedhjet lokale.

“Pse po kërkohet nga VV me pas qasje tjetër kur partitë opozitare e kanë bllokuar Kuvendit ne po kërkojmë zhbllokim. Kemi bërë hapa për zhbllokim duke kërkuar formim të komisionit për votim të fshehtë që lejohet me Kushtetutë këtë e kanë bllokuar dhe po duan ta mbajnë të bllokuar vendit deri në zgjedhjet lokale”, u shpreh ai.

Deputeti i PDK-së: Vetëvendosje duhet të ndërgjegjësohet e ta zhbllokojë Kuvendin

Fadil Demaku, deputeti nga radhët e PDK-së në një prononcim për “Front Online” tha se përgjegjësia për zhbllokimin e situatës politike bie mbi Lëvizjen Vetëvendosje, duke theksuar se qëndrimi i PDK-së është i qartë.

“Ne gjithë herë presim që do të ndërgjegjësohen dhe do të marrin përgjegjësi përpara qytetarëve LVV, gjithçka varet nga ata. Qëndrimi i PDK është i qartë”, theksoi Demaku.

Lutfi Haziri: Takimi i Osmanit me liderët politik pa rezultat, nuk pritet zhbllokim në Kuvend

Deputeti i LDK-së, Lutfi Haziri, deklaroi për “Front Online” se takimi i presidentes Vjosa Osmani me liderët politik nuk ka prodhuar rezultat konkret, dhe sipas tij, nuk pritet të ketë zhbllokim të situatës në seancën e nesërme të Kuvendit.

Haziri ka lënë hapësirë për zhvillime të mundshme në orët e fundit nga LVV-ja.

“Me vet faktin që s’ka pas rezultat dje nga takimi përveç që janë takuar nuk pritet të ketë zhbllokim të situatës të shtunën. Nata është e gjatë që mund me mbërri partia e parë marrëveshje politike në mënyrë që me implementu rezultatin e zgjedhjeve”, deklaroi Haziri.

Deputetja e AAK-së: LVV-ja po insiston në shkeljen e Kushtetutës, kërkon votim të fshehtë

Time Kadrijaj, deputete e AAK-së ka kritikuar Lëvizjen “Vetëvendosje” për insistimin në shkeljen e Kushtetutës, duke kërkuar votim të fshehtë.

“Partitë opozita kanë dhënë opsione për zhbllokim që të ndërrohet kandidati por s’kanë reflektuar po insistojnë në shkelje të Kushtetutës me votim të fshehtë. Osmani tha që do të vazhdojnë me takime dhe nëse s’ka zgjidhje ta dërgojnë në Kushtetuese tash po presim”, u shpreh Kadrijaj.