Drejtuesit e Komitetit Olimpik të Kosovës (KOK), presidenti Ismet Krasniqi, sekretari i përgjithshëm, Shasivar Haxhijaj, anëtarët e Bordit Ekzekutiv, Bujar Turjaka e Jeton Beqiri, si dhe këshilltari i presidentit, Besim Aliti, kanë pritur dje në zyret e KOK-ut ushtruesin e detyrës së presidentit të Komitetit Olimpik të Evropës (KOE/EOC), Niels Nygaard, i cili po e viziton për herë të parë KOK-un.

E pranishme në takim ishte edhe zëvendësministrja për Kulturë, Rini e Sport, Daulina Osmani, përcjell FrontOnline.

Krasniqi duke i uruar mirëseardhje u.d. presidentit Nygaard, e njoftoi me sfidat e sportit tonë në kohë të pandemisë COVID-19, si dhe përgatitjet që KOK-u po bënë për Lojërat Olimpike “Tokio 2020”.

I pari i KOK-ut shprehu gatishmërinë për të bashkëpunuar me Komitetin Olimpik të Evropës, derisa kërkoi nga ai që në të ardhmen në Komisionet e KOE-s të përfshihen edhe përfaqësues të KOK-ut.

U.d. i presidentit të KOE-së, Nygaard, duke falënderuar Krasniqin për mikpritjen, konfirmoi mbështetjen për Komitetin Olimpik të Kosovës, ndërsa vlerësoi lartë të arriturat tona, me theks të veçantë medaljen e artë olimpike të Majlinda Kelmendit, të fituar në Lojërat Olimpike “Rio 2016”.

Danezi Nygaard foli edhe për progresin që po bënë KOE për organizimin e Lojërave Evropiane 2023, për të cilat theksoi se shumë sporte do të vlejnë edhe si kualifikuese për Lojërat Olimpike Paris 2024.

Nga ana e saj, zëvendësministrja Osmani, shprehu mirënjohjen për vizitën e Nygaardit në Kosovë, derisa konfirmoi bashkëpunimin e mirë që ka MKRS-ja me Komitetin Olimpik të Kosovës dhe federatat sportive në vendin tonë.

Në fund, Krasniqi i ndau librin foto-reportazh kushtuar medaljes së artë olimpike të Kelmendit, si dhe një orë të Lojërave Olimpike “Tokio 2020”./FrontOnline/