Nuk është lajm që kripa e tepërt është e dëmshme për shëndetin, por hulumtimet e reja kanë treguar se një dietë që përmban shumë kripë mund të ketë disa efekte të dëmshme të papritura në shëndet, duke mos llogaritur problemet e zemrës dhe presionin e lartë të gjakut.
Një studim i botuar në revistën Nature Neuroscience thotë se minjtë në një dietë “superkripë” treguan shenja të një rënie të konsiderueshme të aftësive mendore në përgjithësi dhe aftësive njohëse në veçanti, sepse truri i tyre qarkullon më pak.
Pas një periudhe të caktuar gjatë së cilës iu dhanë ushqim shumë të kripur, minjtë humbën shumicën e aftësive të tyre të mësuara, gjë që kërkonte zgjidhjen e problemeve të caktuara. Madje, ata nuk reaguan në mënyrën e zakonshme për të prekur mustaqet e tyre.
Këto ndryshime në punën e trurit shfaqeshin edhe në situatat kur një dietë me shumë kripë nuk ua rriste presionin e gjakut. Kjo sugjeron që ushqimet e kripura ndikojnë në trup në mënyra që shkojnë përtej atyre të njohura deri më tani, në lidhje me shëndetin e enëve të gjakut.
Truri është “objektivi” primar i këtyre efekteve të dëmshme të kripës – thuhet në studim. Ata vunë re se minjtë e ushqyer me ushqime të pasura me kripë treguan një rënie të ndjeshme të funksionit cerebral, gjë që është veçanërisht e dukshme në aftësitë njohëse.
Gjatë studimit, shkencëtarët u dhanë minjve nga tetë deri në 16 herë më shumë kripë se zakonisht, në një sasi të përshkruar si “ekstremi më i lartë i spektrit të konsumit të zakonshëm të kripës njerëzore”.
Kjo ka çuar në uljen e qarkullimit në korteks dhe hipokampus, dy rajone të rëndësishme të trurit që janë përgjegjëse për kujtesën dhe mësimin. “Pas tre muajsh të një diete të tillë, minjtë u dementuan”, tha për ABC News Dr Costantino Jadekola, nga Universiteti Cornell në Nju Jork.
Minjtë janë shumë kureshtarë dhe u pëlqen të eksplorojnë gjëra të reja, por me kalimin e kohës, për shkak të kësaj diete, ata kanë humbur fare aftësinë për të vërejtur objekte të reja. Kjo është mjaft e çuditshme, sepse tek minjtë nuk është regjistruar presion i lartë i gjakut, thuhet në studim.
Shkencëtarët thonë se kanë arsye të mjaftueshme për të besuar se i njëjti efekt ndodh tek njerëzit. Në përgjithësi, kufizoni marrjen tuaj ditore të kripës në më pak se 2.3 gram./FrontOnline/
