Presidenti i Turqisë, Recep Tayyip Erdogan, ka thënë se shteti i tij do të bashkëpunojë me Rusinë për të mundësuar respektimin e marrëveshjes së armëpushimit në rajonin Nagorno-Karabah mes Azerbajxhanit dhe Armenisë, raporton Reuters.
Në një fjalim në Parlament, Erdogani ka thënë se Turqia dhe Rusia me një forcë të përbashkët do të mbikëqyrin marrëveshjen e armëpushimit. Kjo marrëveshje ndali luftimet gjashtëjavëshe mes Azerbajxhanit dhe forcave etnike armene në Nagorno-Karabah.
Marrëveshja është cilësuar si fitore nga Azerbajxhani, ndërkaq Armenia është përfshirë në trazira për shkak se po cilësohet si tradhti nga shteti për rajonin që e ka kontrolluar në dekadat e fundit. Nagorno-Karabah njihet si territor i Azerbajxhanit, por kontrollohet tërësisht nga armenët.
Armenia është zhytur në krizë të thellë politike pasi opozita dhe qytetarët e pakënaqur kanë protestuar, duke thyer edhe zyrat e kryeministrit dhe parlamentit pasi e akuzojnë lidershipin e vendit se u tradhtuan interesat kombëtare, duke ia kthyer Azerbajxhanit kontrollin e rajonit separatistë, që e kontrollonte Armenia prej vitit 1994 pas prishjes së Bashkimit Sovjetik.
