Donald Trump thotë se ishte “shumë i zemëruar, i inatosur” me Vladimir Putin për komentet e fundit që bëri për Presidentin e Ukrainës Volodimir Zelensky.
Trump po reagonte ndaj komenteve të Putinit të premten për nevojën e një qeverie të re, kalimtare në Ukrainë.
Presidenti amerikan tha se do të vendosë “tarifa dytësore për të gjithë naftën që del nga Rusia” nëse mendon se Moska është fajtore për dështimin e marrëveshjes për armëpushim.
Në komentet e mëvonshme, Trump përsëriti zhgënjimin e tij, por tha se mendon se Putini “do të jetë i mirë”.
Në të njëjtën kohë, ai kritikoi gjithashtu Zelenskyn se nuk u pajtua për një marrëveshje mineralesh me SHBA.
Komentet e Trump vijnë në kohën kur lufta në Ukrainë vazhdon – me Rusinë që kryen sulme në Kiev, Kharkiv, summy dhe Donetsk dhe vende tjera për të dytën natë me radhë.
Presidenti Trump kërcënoi gjithashtu Iranin me bombardime dhe tarifa dytësore nëse Teherani nuk arrin një marrëveshje me Uashingtonin për programin e tij bërthamor.
Në komentet e para të Trump që kur Irani refuzoi negociatat e drejtpërdrejta me Uashingtonin javën e kaluar, ai i tha NBC News se zyrtarët e SHBA-së dhe iranianëve po bisedonin, por nuk dha detaje.
“Nëse ata nuk bëjnë një marrëveshje, do të ketë bombardime”, tha Trump në një intervistë telefonike. “Do të jetë bombardim i ngjashëm me të cilin ata nuk kanë parë kurrë më parë.”
“Ka një shans që nëse ata nuk bëjnë një marrëveshje, unë do të bëj tarifa dytësore ndaj tyre siç bëra katër vjet më parë,” shtoi ai.
Irani i dërgoi një përgjigje përmes Omanit letrës së Trumpit që i kërkonte Teheranit të arrinte një marrëveshje të re bërthamore, duke thënë se politika e Iranit ishte të mos angazhohej në negociata të drejtpërdrejta me SHBA-të përderisa të jetë nën presion maksimal me kërcënimet ushtarake, citohet të ketë thënë ministri i Jashtëm Iranian të enjten.
Trump kërcënoi gjithashtu me të ashtuquajturat tarifa dytësore, të cilat prekin blerësit e mallrave të një vendi, si për Rusinë ashtu edhe për Iranin. Ai nënshkroi një urdhër ekzekutiv javën e kaluar që autorizon tarifa të tilla për blerësit e naftës së Venezuelës./RTK
