Mbi 40 mijë raste pozitive me COVID-19 janë shënuar deri më tani në Kosovë, përderisa numri i viktimave nga ky virus ka tejkaluar shifrën prej 1000.
Rastet e reja me COVID-19 janë rritur gjatë javëve të fundit, me ç’rast institucionet e vendit kanë shtuar masat kufizuese, duke tentuar kështu ta parandalojnë përhapjen e virusit vdekjeprurës.
Numri i rasteve aktive me COVID-19 në nivel vendi ka arritur në rreth 14 mijë, ku shumica e spitaleve janë të stërmbushura me pacientë.
Drejtoresha e Klinikës Infektive në kuadër të QKUK-së, Lendita Ajazaj, ka deklaruar për Front Online se në këtë klinikë aktualisht janë duke u trajtuar 106 pacientë të infektuar me COVID-19, ku 3 prej tyre janë në gjendje të rëndë.
“Na i kemi 106 pacientë të hospitalizuar, prej të cilëve 62 me oksigjeno terapi. Ndërsa 3 pacientë janë në respiratorë dhe janë në gjendje të rëndë shëndetësore”, tha ajo për Front Online.
Ajo ka shtuar se në rast se mbushen kapacitetet e Klinikës, pacientët e infektuar me COVID-19, do të dërgohen në Klinikat tjera.
“Dje i kemi liruar 15 pacientë, ndërsa 8 i kemi pranuar. Në momentin që mbushen kapacitetet e Klinikës, pacientët udhëzohen për në Klinikat Covid 3 dhe 4”, deklaroj Ajazaj.
Përpos pacientëve, COVID-19 ka prekur edhe personelin e Klinikës, të cilët janë në vijë të parë të frontit të përballjes me pandeminë.
“Katër infektologë i kemi të infektuar me COVID-19”, ka përfunduar ajo.

/Front Online/