Toyota e Japonisë ka miratuar një rritje të pagave për 68,000 punëtorët e saj të sindikalizuar. Kjo është rritja më e madhe e pagave në dy dekadat e fundit, njoftoi të mërkurën kompania e famshme e makinave, pa treguar shkallën e rritjes.

Vendimi i Toyota është një nxitje për fushatën e kryeministrit japonez Fumi Kishida për të rritur pagat në përputhje me inflacionin. Së fundmi kompanitë Uniqlo, Nintendo, Birraria Suntori kanë rritur pagat dhe pritet që lëvizja e prodhuesit më të madh japonez të makinave të pasohet nga kompani të tjera, raporton Financial Times.

Presioni i qeverisë dhe i sindikatave ndaj kompanive japoneze për të rritur pagat është intensifikuar këtë vit, pasi inflacioni bazë i Japonisë, i cili përjashton çmimet e paqëndrueshme të ushqimeve të freskëta, goditi katër për qind në dhjetor, më i larti që nga viti 1982.

Toyota tha se pranoi plotësisht kërkesën e sindikatës së saj për një rritje të pagës bazë dhe vjetërsisë. Kompania arriti një marrëveshje me sindikatat në ditën e parë të bisedimeve, të cilat pritej të zgjasin me ditë të tëra.

“Ne jemi në ballë të inkurajimit të shpërndarjes së pasurisë në të gjithë industrinë e automjeteve dhe secili prej nesh po punon shumë për ta bërë këtë,” tha Koji Sato, i cili do të marrë detyrën si shef ekzekutiv i kompanisë në prill./FrontOnline/