Me ndeshjen që u zhvillua sot ndërmjet Trepçës ’89 dhe Dukagjinit në barazh për Superligën e Kosovës në futboll i është vu perdja edicionit 2020/21.
Ky kampionat solli shumë emocione, momente të bukura, lojë të mira por edhe zhgënjim e akuza. Në fund skuadrat që festuan ishin Prishtina kampione dhe Llapi e Drita që siguruan pjesëmarrjen në garat ndërkombëtare, derisa Besa, Arbëria e Trepça ’89 i dhanë lamtumirën elitës së futbollit.
Me t’u mbyllur gara, klubet i kanë dërguar futbollistët në pushim, por e keqja është se edhe vetë drejtuesit e skuadrave po pushojnë. Kjo sipas trajnerit të mirënjohur, Afrim Tovërlani është gabim, pasi skuadrat qysh në këtë kohë duhet t’i bëjnë planet e punës për edicionin e ri, e jo të mbesin deri në ditën e fundit.
Ballkani e Feronikeli janë dy skuadra të mëdha por që ende nuk i kanë zyrtarizuar trajnerët për edicionin e ri, madje edhe me disa lojtarë nuk e kanë të qartë nëse do t’u mbeten apo do t’u largohet. Kjo praktik sipas Tovërlanit është e gabuar.
Jemi dëshmitarë të skuadrave të mëdha evropiane të cilat pothuaj as dy ditë nuk mbesin pa trajnerë, me t’u larguar njeri, menjëherë e zyrtarizojnë tjetrin, nuk duan humbje kohe, gjë e cila nuk po ndodh edhe tek ne.
“Klubet serioze me të përfunduar gara nisin organizimin për edicionin e ri. Në këtë kohë trajneri i bënë planet se cilët lojtarë i duhen për përforcime, cilët duhet liruar nga skuadra. Nuk duhet pritur në momentet e fundit të nisin të kërkojnë lojtarë, pasi atëherë është shumë vështirë, por ja që tek ne kjo ndodh shpesh. Duhet ta kuptojmë se nuk punohet sot për nesër, çurani nuk ruhet për natën e Bajramit”, ka thënë njëri nga trajnerët më të trofeshëm në vendin tonë Afrim Tovërlani për Demokracia.com.
Emri i “Tokit” është përmendur si një mundësi për ta marrë drejtimin e Ballkanit, por kjo gjë duket se është vetëm në fazën e spekulimeve, pasi i pyetur nëse ka vendos se ku do të punojë në pranverë, Tovërlani ka qenë shumë i qartë. “Jo nuk kam vendos ende asgjë”.
