Debati i dytë mes presidentit amerikan, Donald Trump, dhe rivalit të tij, Joe Biden, është përcjellur nga rreth 63 milionë shikues përmes televizioneve, që është shifër shumë më e ulët se shikueshmëria e debatit të parë.

Shifra e shikueshmërisë e paraqet mesataren e audiencës në 15 rrjete televizive që e transmetuan drejtpërdrejt debatin të enjten në mbrëmje. Më së shumti shikues pati kanali “Fox News – 15.4 milionë, shkruan Reuters, transmeton Gazeta Express.

Kreu i Shtëpisë së Bardhë përdori një ton më të përmbajtur kësaj here, në krahasim me debatin e shtatorit, kur ai e ndërpreu dhe e pengoi dhjetëra herë rivalin gjatë dhënies së përgjigjeve. Në debatin e parë, shifra e shikueshmërisë ishte 73.1 milionë persona.

Një arsye për numër më të vogël të shikuesve mund të ketë qenë edhe një ndeshje e futbollit amerikan, e cila u transmetua në të njëjtën kohë në televizionin Fox.

Sidoqoftë, shifra e publikuar e shikueshmërisë i përfshin vetëm njerëzit që e kanë shikuar debatin para televizorit dhe nuk i përfshin platformat digjitale, të cilat po bëhen më të popullarizuara, përderisa shikueshmëria e televizioneve po bie.

Ndryshe, debati presidencial me shikueshmërinë më të madhe në historinë e Shteteve të Bashkuara ishte ai mes Trumpit dhe Hillary Clintonit më 2016, i cili ishte shikuar nga 84 milionë njerëz vetëm përmes televizioneve.