Deputeti i Kuvendit të Kosovës nga radhët e Partisë Demokratike të Kosovës (PDK), Ferat Shala, ka akuzuar Qeverinë Kurti për krijimin e pabarazisë mes qytetarëve të Kosovës në sektorin e energjisë, raporton Front Online.

Në një reagim të tij, Shala ka theksuar se Zyra e Rregullatorit për Energji (ZRrE), si Institucion i pavarur i zgjedhur nga Kuvendi i Kosovës, ka mandat të veprojë në gjithë territorin e vendit, pa dallime rajonale.

Megjithatë, sipas tij, në mandatin aktual qeverisës është bërë ndarja e qytetarëve në kategori dhe regjione, me theks të veçantë midis veriut dhe jugut të vendit — veprim që ai e cilëson si antiligjor dhe shkelje të parimit të barazisë qytetare, raporton Front Online.

Shala kritikoi faktin se, nën qeverisjen e Albin Kurtit, një pjesë e qytetarëve që jetojnë në pjesën jugore dhe janë pjesë e tregut të rregulluar energjetik, janë përballur me rritje të tarifave të energjisë tri herë brenda katër viteve. Ndërkohë, qytetarët në pjesën veriore, që operojnë në një treg të derregulluar, nuk kanë pësuar rritje të çmimeve.

Deputeti i PDK-së theksoi se, përmes marrëveshjes për energjinë të arritur pas katër vitesh negociata me kompaninë Elektrosever, kryeministri Kurti zyrtarizoi ndarjen e qytetarëve në dy tregje të ndryshme energjetike. “Thënë thjesht, qytetarët në veri nuk do të kenë rritje të tarifave, ndërkohë që pjesa tjetër e Kosovës po përballet me rritje prej 16.1%,” deklaroi ai, raporton Front Online.

Në fund, Shala e quajti këtë model të qeverisjes si një “sovranitet energjetik improvizues dhe popullist”, i cili, sipas tij, po manifestohet edhe në shumë sektorë të tjerë të ekonomisë.

Postimi i tij i plotë:

ZRrE, është institucion i pavarur, rregullator i zgjedhur nga Kuvendi i Kosovës për të kryer mandatin në tërë territorin e Kosovës.

Andaj ndarja e qytetarëve në kategori e regjione veçanërisht në këtë mandat qeverisës, në theks të veçantë veri dhe jug, është antiligjore,është pabarazi qytetare. Kjo ndodhë në qeverisjen e z. Kurti, ku një pjesë e qytetarëve të Republikës së Kosovës janë në treg të rregulluar energjetik dhe u ngritet çmimi i energjisë tri herë për katër vite. Ndërkaq pjesës tjetër të qytetarëve që janë në treg të derregulluar energjetik, në veri të Kosovës, nuk kanë rritje të çmimit të energjisë. Zyrtarisht, z. Kurti, me marrëveshjen për energjinë pas katër vite negociata me elektrotroserverin i ndau qytetarët e Kosovës në dy tregje të ndryshme energjetike. Pra , thënë thjeshtë për qytetarët, pjesa veriore e Kosovës për qytetarët atje nuk do të ketë ngritje të tarifave të energjisë siç po ndodhë me pjesën tjetër të Kosovës rritja me 16.1%.

Ky është sovraniteti energjetik i qeverisë Kurti!Sovranitet të tillë, improvizues popullist e ke pothuajse në shumë sektorë të ekonomisë.

Nuk është e rastësishme zvarritja e formimit të institucioneve!