Kandidati i Partisë Demokratike të Kosovës për kryeministër, Bedri Hamza, dhe kandidati për kryeministër i Lidhjes Demokratike të Kosovës, Lumir Abdixhiku janë takuar mbrëmë, bëjnë të ditur burime të Gazetës Express.
Takimi është mbajtur larg syrit të publikut.
PDK-ja dhe LDK-ja, por edhe AAK-ja, e kanë përjashtuar mundësinë e një koalicioni qeveritar me LVV-në e kryeministrit Albin Kurti.
Kurti ka thënë se partia e tij do ta formojë Qeverinë e re të vendit, ndërsa ka paralajmëruar “bisedime” pas certifikimit të rezultateve përfundimtare të zgjedhjeve paralamentare të 9 shkurtit.
LVV-ja ka marrë 42.30% të votave, sipas rezultateve përfundimtare, ndaj Kurtit do i nevojitet një partner nga ana e opozitarëve për të qëndruar më tej në pushtet.
PDK-ja ka marrë 20.95% të votave, ndërsa LDK-ja 18.27%.
Koalicioni i AAK-së me Nismën dhe të tjerët ka marrë 7.06% të votave.
LVV-ja ka 48 ulëse në Kuvendin e Kosovës, ndërsa PDK-ja (24), LDK-ja (20) dhe AAK-Nisma (
, kanë së bashku 52 deputetë.
Hamza ka thënë para disa ditësh se PDK-ja do ta presë radhën, duke përsëritur se LVV-ja e ka e para të drejtën që të përpiqet ta formojë Qeverinë.
Ndërsa një koalicion të mundshëm me LVV-në e kanë përjashtuar tri partitë opozitare, Hamza tha se PDK mund ta harmonizonte programin e saj me programet e partive të tjera opozitare.
Më i paqartë mbetet qëndrimi Nismës së Fatmir Limajt, i cili para disa javësh shprehu gatishmërinë për t’u futur në koalicion qeveritar edhe me LVV-në.
