Një grua ka sulmuar dy kalimtarë me thikë në qytetin e Luganos në Zvicër. Prokurorët atje thonë se dyshojnë që incidenti ishte motivuar nga terrorizmi.
Autoritetet zvicerane po hetojnë një sulm të mundshëm terrorist pasi dy femra u plagosën me thikë në një dyqan në qytetin jugor të Luganos të martën.
Policia kantonale në Ticino tha se plagët e femrave nuk ishin kërcënuese për jetën dhe e dyshuara 28-vjeçare që jeton në zonë, ishte në paraburgim.
“Një dyqan në Lugano ishte skena e një sulmi të dyshuar të motivuar nga terrorizmi ndaj disa njerëzve,” tha Zyra Federale e Prokurorit të Përgjithshëm në një deklaratë.
Policia tha se sulmuesi i dyshuar kishte goditur me thikë dy femra, duke plagosur një në qafë me një armë të mprehtë.
Incidenti ndodhi në seksionin multimedial të një dyqani Manor në qendër të qytetit.
Vetë Zvicra nuk ka parë incidente terroriste në shkallë të gjerë që kanë ndodhur kohët e fundit në vendet fqinje, siç janë sulmet në Paris, Nice dhe Vjenë.
Sidoqoftë, dy burra u arrestuan në qytetin Winterthur këtë muaj për lidhje me të shtënat vdekjeprurëse në Vjenë.
Kancelari austriak Sebastian Kurz dënoi sulmin e së martës në Lugano dhe u zotua të punojë me Zvicrën në një “përgjigje të përbashkët ndaj terrorizmit islamik në Evropë”.
