Studimi i ri ka treguar se vitamina D nuk është aq efektive në uljen e rrezikut të infeksionit me koronavirus siç mendohej më parë. Në fillim të pandemisë, ekspertët inkurajuan marrjen e vitaminës D, sepse studimet e hershme treguan se popullatat në të cilat ishte regjistruar mungesa e vitaminës D ishin në një rrezik më të lartë të infeksionit të koronavirusit. Sidoqoftë, një studim i ri, i botuar në PLOS Medicine, zbuloi se marrja e vitaminës D mund të mos ju mbrojë nga infeksioni.

Studiuesit në Universitetin McGill në Quebec, Kanada, janë përqendruar në variante gjenetike që lidhen me rritjen e niveleve të vitaminës D. Ata kanë zbuluar se njerëzit, ADN-ja e të cilëve përmban një nga këto variante ka më shumë të ngjarë të kenë nivele më të larta të vitaminës D. Megjithatë, faktorët e jashtëm siç është dieta mund të ndikojnë në këto nivele. Studiuesit analizuan të dhënat mbi variantet gjenetike në 14,000 njerëz që kishin covid-19 dhe i krahasuan ato me të njëjtat të dhëna nga mbi 1.2 milion njerëz që nuk kishin këtë sëmundje infektive.

Doli se ata që kishin një nga këto variante gjenetike dhe kishin më shumë të ngjarë të kishin nivele më të larta të vitaminës D, nuk kishin rrezik më të ulët të infeksionit koronavirus, shtrimit në spital ose zhvillimit të sëmundjes së rëndë covid-19. Për fat të keq, gjetjet e këtij studimi sugjerojnë që marrja e vitaminës D shtesë – megjithëse e dobishme për sistemin imunitar, shëndetin e kockave dhe gjendjen shpirtërore – nuk është aq efektive në luftimin e covid-19. Vlen të përmendet se kjo lloj analize, e quajtur studimi i randomizimit Mendel, konsiderohet si “standardi i artë” për kërkimin klinik./FrontOnline/