Në disa komuna të Kosovës sot u protestua.

Por, kësaj here kjo protestë ishte organizuar nga nxënësit.

Motoja “S’po shkohet në shkollë” ishte slogani kryesor i nxënësve në këtë protestë.

Kjo, protestë u organizua për të kundërshtuar ngacmimet seksuale, bullizmin dhe mungesën e psikologëve, të cilat sipas organizatorëve po pengojnë zhvillimin e cilësisë së arsimit, shkruan FrontOnline.

Por si po e shohin këtë protestë sociologë e njohës të arsimit në vend.

Sociologu Shala: Protesta tregon mungesën e organizimit të shkollave për t’i adresuar problemet

Sociologu Adem Shala, thotë për FrontOnline se protesta e sotme e nxënësve në disa komuna tregon mungesën e organizimit të shkollave.

Sipas tij, këto probleme së pari duhet të adresohen në shkollë, e më pas të ketë organizim të protestave.

“Në fakt kjo po e tregon më shumë mungesën e organizimit të shkollave në një far mënyre, edhe thjesht mi adresu këto probleme në shkolla, kjo kish me qenë prioritet para se me ardh deri tek çështja e protestave dhe organizimeve”, tha ai për Front Online.

Ndërsa, thotë se shkollat duhet të rrisin efikasitetin e bashkëpunimit multidisiplinar dhe multiprofesional.

 “Shkollat duhet të rrisin efikasitetin e  bashkëpunimit multidisiplinar dhe multiprofesional, në mënyrë që më i trajtu problemet që i kanë nxënësit në këtë raste”, thotë ai për Front Online.

Qehaja: Protesta e sotme dëshmon që të rinjtë tashmë janë aktivizuar

Ndërsa, qëndrim tjetër ka njohësi i arsimit, Rinor Qehaja.

Ai, për FrontOnline thotë se kjo dëshmon për aktivizim të të rinjve duke bërë presion.

“Iniciativa si kjo janë të mirëseardhura dhe dëshmojnë për një aktivizim të shtuar qytetar në mesin e të rinjve. Kërkesa për përgjegjësi është pikënisje e ndryshimit, dhe ajo duhet të filloj nga komuniteti i shkollës për mësimdhënie më të mirë në shkollë, për këtë nevojitet të kemi prindër dhe nxënës të fuqizuar që janë të vetëdijshëm që ndryshimi mund të ndodhë edhe nga ta si një presion i rritur qytetar”, tha ai.

Qehaja thotë se nëse prindërit dhe nxënësit do të kërkonin llogari, atëherë shkollat e vendit nuk do të kishin mësimdhënës të papërgatitur.

“Nuk besoj që do të kishim mësimdhënës të papërgatitur për orë, po nëse do të kishim prindër dhe nxënës që kërkojnë llogari, sikurse që nuk besoj që do të kishim reforma spontane në sistem nga niveli qendror po nëse do të kishim një komunitet të mësimdhënësve të vetëdijshëm dhe të fuqizuar”, tha ai për Front Online.

Për, këtë protestë sot ka reaguar edhe ministrja e arsimit, Arbërie Nagavci.

Ajo ka shkruar se i gëzohet aktivizmit të të rinjve dhe mendimit të njëjtë se cilësia në arsim kërkon angazhim të përbashkët./FrontOnline