Ekipi i Kosovës në xhudo e mbylli Kampionatin Evropian “Lisbona 2021” me tri medalje të fituara.
Distria Krasniqi dhe Akil Gjakova fituan medalje të arta, derisa Nora Gjakova e fitoi të bronztën, shkruan FrontOnline.
Përveç tyre, Kosova mori pjesë në këtë garë edhe me Laura Fazliun dhe Loriana Kukën, të cilat zunë vendin e pestë në kategoritë përkatëse.
Kështu, Kosova ishte shteti më i suksesshëm në këtë garë me tri medalje të fituara dhe me dy “vende të pesta”.
Për punën e madhe të Driton Kukës dhe xhudistëve tanë ka folur edhe trajneri Bylbyl Sokoli.
“Është mburrje për ne që kemi këta sportistë. Kjo është e arritur e madhe e sportit të Kosovës. Medaljet janë fituar në një sport olimpik që vlerësohet shumë”, ka thënë Sokoli në “Dueli Sportiv”.
“Ky është një rezultat që nuk e kemi pasur asnjëherë, duke lënë pas fuqitë e botës, ishte një prezantim brilant për sportistët tanë”, tregoi ai.
“Sa i përket Kukës, pse të mos e nisim këtu një iniciativë që Universiteti i Prishtinës ta shpallë Driton Kukën ‘doktor nderi’ pas gjithë këtyre rezultateve”, nënvizoi “Profa”./FrontOnline/
