Sot luhet ndeshja e parë e finales së plejofit në Superligën e Kosovës në hendboll në konkurrencë të femrave. Nga ora 18:30 në palestrën në Istog përballen Istogu e Vushtrria.

Istogu në gjysmëfinale e eliminoi Ferizajn, ndërsa Vushtrria pas dy ndeshjeve ishte më e suksesshme se Prishtina, përcjell FrontOnline.

Kthimi i Burneta Ramës ka rritur besimin te vushtrriaset, që synojnë paraqitje të fuqishme në ndeshjet finale.
Ndërkohë istogaset synojnë të vazhdojnë me fitore.

Skuadra e Istogut ka fituar të gjitha ndeshjet e stinorit të rregullt e po ashtu shënoi dy fitore në gjysmëfinale.

Me Vushtrrinë, Istogu luajti edhe dy ndeshje evropiane, që po ashtu i fitoi.

Finalet janë gjithnjë interesante dhe dramatike dhe për të tilla shpresohet edhe këtë herë. Skuadra që shënon dy fitore apo një fitore e një barazim, siguron titullin e kampionit./FrontOnline/