Isak Skenderi, udhëheqës i organizatës Zëri i Romëve, Ashkalive dhe Egjiptianëve, deklaroi se pjesëtarë të këtyre komuniteteve nuk po trajtohen të barabartë me të tjerët.
Siç u shpreh në emisionin Rubikon të Klan Kosovës, problemi qëndron edhe tek fakti që gjërat po gjeneralizohen, duke u fajësuar i gjithë komuniteti për shkak të aktit të keq të një individi të caktuar.
“Gjithmonë jemi konsideruar si qytetarë të shkallës së dytë. Nuk jemi vlerësuar njëjtë dhe barabartë. Jemi shtypur, jemi shkelur, dhe për të mbërritur diçka në jetë ndoshta është dashur të investojmë shumëfish”.
“Disa gjëra tashmë veçse janë të qarta: komunitetet rom, ashkali dhe egjiptas kanë qenë bashkëpunëtorë të sistemit e regjimit serb, por bëhet fjalë për disa pjesëtarë të komunitetit. Disa njerëz po ashtu kanë qenë edhe viktima të luftës në përgjithësi”.
“Problemi me ne është që gjërat po gjeneralizohen, pra nëse njëri bën diçka keq, atëherë i gjithë komuniteti është i keq. Por nëse njëri prej nesh bën diçka të mirë, atëherë ai më nuk është rom. Për ta pranuar të mirën e atij personi, atë po e asimilojmë dhe po e bëjmë shqiptar, serb ose anglez”, deklaroi Skenderi.