Rreth 50 mijë euro tender të negociuar për punë shtesë në Urën e Badovcit ka dhënë Ministria e Infrastrukturës, e cila udhëhiqet nga zv/ministri Hysen Durmishi, ndonëse punët në ndërtimin e saj janë në fazën fillestare, raporton portali Front Online.

Në dhjetor të vitit 2023 kjo Ministri i kishte dhënë tender në vlere prej rreth 470 mijë euro kompanisë “Dreni Inginiering” për ndërtimin e Urës së Badovcit.

Punimet do të duhej të përfundonin për 125 ditë, pas 250 ditëve vetëm sa kanë filluar punimet

Sipas deklaratave të zyrtarë të Ministrisë, punimet në Urë do të duhej të përfundonin brenda 125 ditëve. Por, tashmë kur kanë kaluar 250 ditë nga dhënia e kontratës dhe punët janë në fazë fillestare, është e çuditshme se si Ministria e Infrastrukturës është nxituar të jap kontratë tjetër për punë të shtesë në vlerë prej rreth 47 mijë euro, pikërisht të njëjtës kompani “Dreni Inginiering”.

Në bazë të praktikave dhe monitorimeve të procesit të prokurimit që ka bërë Front Online, kontratat për punë shtesë jepen zakonisht në fund të procesit të punimeve për punë të vogla dhe që nuk janë paraparë me tender. Por, në këtë rast vlera e përgjithshme e tenderit është shtuar për 10%, ndonëse punët vetëm sa kanë filluar në ndërtimin e Urës. Përndryshe, Ura e Badovcit është vetëm 38 metra e gjatë.

Portali Front Online i ka dërguar gjatës ditës së martë Ministrisë së Infrastrukturës pyetje në lidhje me kontratën për punë shtesë në vlerë prej rreth 47 mijë euro për Urën e Badovcit dhe për çfarë punë shtesë bëhet fjalë, ndonëse punimet në ndërtimin e Urës janë në fazën fillestare. Por, nga Ministria nuk kanë kthyer kurrfarë përgjigje.

Gashi nga AVONET: Ministria e Infrastrukturës ka shkelur rëndë Ligjin e Prokurimit

Në anën tjetër, Kenan Gashi, drejtor ekzekutiv në OJQ-në “AVONET”, ka thënë për Front Online se dhënia e kontratës për punë shtesë për një projekt ende të papërfunduar është Shkelje e Ligjit ntë Prokurimit Publik dhe njëkohësisht vepër e rëndë penale.

“Pos që është shkelje e rëndë e Ligjit të Prokurimit Publik, por është edhe një prej veprave më të rënda të keqpërdorimit të parasë publike. Kjo është një prej praktikave më të këqija të mundshme, të cilën vet Hysen Durmishi e ka kritikuar sa ka qenë në opozitë”, ka pohuar Gashi.

/FrontOnline/