Sindikata e Punëtorëve të Industrisë së Automjeteve të Shteteve të Bashkuara (UAW) ka arritur një marrëveshje të re kolektive me General Motors (GM), pasi arriti një marrëveshje me konkurrentët Ford dhe Stellantis javën e kaluar, raportojnë mediat amerikane, transmeton FrontOnline. Kjo i dha fund grevës gjashtë-javore të punëtorëve në industrinë amerikane të automobilave.

Punëtorët në të tre kompanitë po kthehen në punët e tyre në përputhje me marrëveshjen, megjithëse miratimi përfundimtar i kontratave duhet ende të votohet nga anëtarësia e sindikatës UAW.

Greva u iniciua nga UAW më 15 shtator dhe gradualisht u zgjerua, por vetëm 45,000 nga 146,000 anëtarët e sindikatës ishin në grevë.

Për momentin nuk dihen detajet e marrëveshjes me General Motors, por mediat amerikane raportojnë se është e njëjta marrëveshje me Ford dhe Stellantis.

Parashikohet rritje 25 për qind të pagave për punonjësit gjatë kohëzgjatjes së kontratës kolektive, si dhe janë zbatuar disa kërkesa të tjera, si harmonizimi i pagave me rritjen e kostos së jetesës, që krahas rritjes së inflacionit do të thotë më i lartë se 25%.

Në fillim të grevës, UAW kërkoi rritje të pagave me 40 për qind, ndërsa drejtuesit e tre gjigantëve amerikanë të automobilave, nga ana tjetër, ofruan vetëm rreth nëntë për qind.

Presidenti amerikan Joe Biden është gjithashtu i lumtur, pasi ai ishte i vetmi president amerikan në histori që iu bashkua shkurtimisht sindikalistëve grevistë pranë Detroitit në shtator dhe shprehu mbështetjen e tij për ta. Në reagimin e tij të parë për përfundimin e grevës, Biden tha se ishte një lajm shumë i mirë./FrontOnline/