KESCO ka kërkuar nga Zyra e Rregullatorit të Energjisë Elektrike (ZRRE) të hyra të lejuara maksimale për vitin 2026 në vlerë prej rreth 530 milionë euro, kërkesë kjo që çon në shtrenjtim të tarifave energjisë elektrike prej rreth 20% prej 1 prillit të këtij viti, raporton portali FrontOnline.

Sipas kërkesës së KESCO-s drejtuar ZRRE-së vetëm për import të energjisë elektrike për vitin 2026 pritet të shpenzohen rreth 230 milionë euro, pasi që sipas bilancit energjetik për vitin 2026, importi përbën rreth 9% të energjisë së nevojshme për mbulimin e kërkesës.

Përveç shumë së lartë të importit, KESCO ka kalkuluar edhe të hyrat e mirëmbajtjes në vlerë prej 11 milionë euro, kostot e bartshme në vlerë prej rreth 228 milionë euro, 11.1 milionë euro shpenzime të tjera dhe korrigjime ne vlerë prej rreth 50 milionë euro, raporton Front Online.

“Kërkesa finale për të hyrat e lejuara maksimale për vitin 2026 kap shifrën prej 528.78 milionë euro”, thuhet në kërkesën e KESCO-s drejtuar ZRRE-së.

Përndryshe, kjo është hera e tretë që shtrenjtohet energjia elektrike gjatë mandatit të Qeverisë “Kurti”.

/FrontOnline/