Ekonomia e Shqipërisë vazhdon trendin e rritjes, e nxitur nga konsumi privat dhe një sezon i mirë turistik dhe gjatë vitit të ardhshëm pritet të shënojë ngritje 3.8 për qind, sipas raportit të Komisionit Evropian, ku janë marrë në shqyrtim vendet anëtare të BE-së, ato të Eurozonës dhe vendet kandidate.

Sipas parashikimeve të KE-së, pas një rënieje të shpejtë në vitin 2024, inflacioni pritet të kthehet gradualisht në objektivin  3 për qind të Bankës Qendrore të Shqipërisë për vitin 2025.

“Ekonomia shqiptare vazhdoi trendin e fortë të rritjes në gjysmën e parë të vitit 2024, me rritjen reale të prodhimit të brendshëm bruto që u ngjit në 4.1 për qind. Konsumi privat shënoi rritje të lartë 4.4 për qind në tremujorin e parë, i ndjekur nga 6 për qind në të dytin, i mbështetur nga rritja e pagave reale, rritja e fortë e kredisë dhe kushtet akomoduese financiare”, thuhet në raport.

Investimet u rritën më shpejt se në vitin 2023 dhe pritet të përshpejtohen në gjysmën e dytë të vitit 2024 për shkak të rritjes së shpenzimeve kapitale publike.

Bumi turistik shtyu eksportet e shërbimeve, ndërsa eksportet e mallrave vazhduan të tkurren për shkak të uljes se kërkesës nga Eurozona, rënie e çmimeve të lëndëve të para në tregjet ndërkombëtare dhe forcimi i kursit të këmbimit të lekut.

Komisioni Evropian evidenton në raport se punësimi u rrit në vitin 2023 dhe pritet të rritet më tej gjatë viteve 2024-2026, megjithëse me një ritëm më të moderuar.

Shkalla e papunësisë pritet të bjerë më tej, teksa emigracioni mbetet një problem pavarësisht përmirësimeve në tregun e punës.

Inflacioni është më shumë se përgjysmuar në 12 muajt e fundit në 1.9 për qind në shtator 2024.

Sipas KE-së, pozicioni fiskal i Shqipërisë u përmirësua në vitin 2023, me deficitin e qeverisë të ulur në 1.3 për qind të produktit të brendshëm bruto, teksa në 9-mujorin e parë 2024 të ardhurat u rritën rreth 10 për qind në terma vjetorë, në përputhje me planin buxhetor. /tch