Rundi i parë zgjedhor më 17 tetor, Shpejtim Bulliqin e nxori të dytin në Podujevë.

E fill pas kësaj date, komuna – që ai aktualisht drejton – ka dhënë shpejt e shpejt disa tenderë përmes procedurës direkte pa publikim të njoftimit të kontratës. Janë 4 sosh që u janë dhënë kompanive të ndryshme.

Kontratat kanë të bëjnë me kryerjen e punëve shtesë në disa rrugë të fshatrave dhe lagjeve të Llapit, shkruan “Front Online”.

Tenderët një burimor, ligjërisht, janë të lejuar. Megjithatë, dyshuese është koha që u përzgjodh për nënshkrimin e tyre. Firma mbi ta u hodh tash në prag të balotazhit atje. Ai do të mbahet më 14 nëntor. Përballë do të jenë: Shpejtim Bulliqi i VV-së dhe Ekrem Hyseni i LDK-së.  Nga kjo e fundit këtë e shohin si tentimblerje votash nga ana e VV-së.

Kronologjia e tenderëve 

Tenderin e parë një burimor, Podujeva, e udhëhequr nga Bulliqi, e dha më 21 tetor 2021.

Kontrata u lidh me kompaninë, “Bini”. Vlera e saj mbi 18 mijë euro, shkruan “Front Online”.

Puna për të cilën palët ranë dakord: demolim dhe ndërtim i trotuareve në rrugën, Ilir Konushefci.

Tjetra kontratë e natyrës së njëjtë u nënshkrua më 27 tetor.

Tash Podujeva shpërbleu me kontratë mbi 10 mijë euro biznesin, “Integral”.

Kjo e fundit u angazhua për disa punime shtesë në rrugët e fshatrave, Dumosh, Lladoc dhe Miroc – lot II.

Në njërin nga këto tri katunde, atë Lladoc, Bulliqi doli më poshtë me rezultatet sesa Ekrem Hyseni.

Bulliqin e votuan 158 qytetarë këtu e Hysenin 183, shkruan “Front Online”.

Kurse në katundin tjetër, Dumosh, Bulliqi doli më mirë, por me një diferencë të vogël:

Shpejtim Bulliqi – 242

Ekrem Hyseni – 209

Më 10 nëntor pasoi tenderi tjetër.

“MILENIUM KONSTRUCTION” u zgjodh fituese nga komunarët për disa punime shtesë në qytet dhe fshatra.

Kontrata kapte vlerën e mbi 8 mijë eurove, shkruan “Front Online”.

I fundit tender një burimor u dha sot.

Podujeva shpërbleu konsorciumin “Prishtina dhe Te Burimi” me kontratë mbi 1 mijë e 700 euro.

LDK akuzon Bulliqin për tentimblerje votash

Dhënien e tenderëve të mbyllur po e kritikojnë nga taborri i LDK-së.

Ish-asambleisti i kësaj partie në kuvendin e kaluar komunal, Hasan Ajeti akuzoi Bulliqin për tentimblerje votash përmes tenderëve për asfaltim e punë të tjera, të nënshkruar gjatë kohës së zgjedhjeve.

“Tjeter element s`ka. Kështu po dëshiron me ble paqen, votën. Po e keqpërdor paranë publike”, u shpreh Ajeti për “Front Online”.

Sipas tij, kjo s`do të ketë efekt në rezultatin e 14 nëntorit.

“Qytetarëve më me asfalt nuk mundesh me ia ndryshu qasjen. Qytetarët janë përcaktu me Ekremin”, theksoi ai për “Front Online”.

Lidhur me këto pretendime të partisë rivale, Front Online ka tentuar të marrë një përgjigje nga vetë Shpejtim Bulliqi.

Megjithatë, kontakti me të përmes telefonit ishte i pamundur gjatë ditës.

Ligji vs. koha

Autoriteti kontraktues, në këtë rast komuna e Podujevës, mund të përdorë procedurat e negociuara pa publikimin e njoftimit të kontratës për të ushtruar aktivitetin e prokurimit.

Këtë ia lejon neni 35 i Ligjit të Prokurimit.

Tenderët e mbyllur mund të zbatohen në mesin e shumë aktiviteteve edhe për dhënien e një kontrate të shërbimeve ose punëve shtesë, si në tenderët e mësipërm,  punë këto të paparashikuara në konceptin fillestar.

Megjithatë, mbetet dyshues fakti se pse koha për lidhjen e këtyre kontratave u zgjodh të jetë pikërisht kjo ndërmjet rundit të parë dhe atij të dytë zgjedhor, periudha tetor – nëntor.

Më 17 tetor të 2021-s, Shpejtim Bulliqi nuk arriti të fitojë në Podujevë pa balotazh, duke dështuar ta përsëris suksesin e 2020-s me mbi 50 % të votave. Ai doli i dyti me 44.16 % kundrejt Ekrem Hysenit të LDK-së që u rendit i pari me  44.25 % të votave.