Shoqëria Lëvizja ka reaguar pas arrestimeve të fundit nga Gjykata Speciale, duke thënë se rehabilitimi i masakrave serbe nga njëra anë, dhe arrestimi e dënimi i luftës për lirinë e Kosovës, nuk i shërben normalizimit të marrëdhënieve Kosovë-Serbi dhe si i tillë nuk i shërben stabilitetit, paqes dhe sigurisë në rajon e më gjerë.
Në një deklaratë politike, Shoqëria Lëvizja përkujton se përpjekjet dhe projektet për t’ia mohuar të drejtën popullit shqiptar në Kosovë për të jetuar i lirë dhe plotësisht i pavarur nga Serbia nuk janë të reja dhe as të panjohura për kombin tonë, ashtu siç nuk është i panjohur për botën as terrori, gjenocidi dhe holokausti serb në Kosovë.
Në këtë drejtim, ajo përmend fushatën e ngritur pas luftës kundër luftëtarëve të lirisë të UÇK-së përmes dosjeve të fabrikuara dhe të trilluara nga administrata shtetërore neofashiste serbe, e cila me mbështetjen e fuqishme të aleatëve të Serbisë, gjetën mbështetës e strehë deri në Këshillin e Evropës, i cili, mbi bazën e shpifjeve dhe trillimeve monstruoze të Serbisë për “trafikim të organeve”, miratoi raportin famëkeq të senatorit zviceran Dick Marti, i cili çoi drejt formimit të Gjykatës Speciale.
Shoqëria Lëvizja thotë se gjykata speciale duhej krijuar për hetimin, zbardhjen dhe dënimin e krimeve, masakrave dhe gjenocidit serb në Kosovë dhe jo të persekutohen luftëtarët e UÇK-së.
Ajo njëherësh bën thirrje për hetimin dhe zbardhjen e secilit krim pa dallim përkatësie kombëtare dhe dënimin e atyre që kanë planifikuar, urdhëruar dhe kryer krime mbi shqiptarët duarthatë.
“Gjykata Speciale, duhej krijuar për hetimin, zbardhjen dhe dënimin e krimeve, të masakrave dhe të gjenocidit serb në Kosovë… Sepse, krimet, masakrat dhunimet, gjenocidi dhe dëbimi, me qëllim të spastrimit etnik, janë bërë nga shteti terrorist serb. Nëse ka ndodhur ndonjë krim për hakmarrje apo për qëllime politike, etj. në Kosovë duhet të hetohet, të zbardhet e të dënohet nga drejtësia vendore”, theksohet në deklaratë.
Shoqëria Lëvizja ia kujton klasës politike të Kosovës, bashkësisë ndërkombëtare dhe Serbisë, që pavarësia e Kosovës është vulosur dhe legjitimuar edhe nga opinioni i Gjykatës Ndërkombëtare të Drejtësisë dhe se çdo koncesion në dëm të pavarësisë dhe sovranitetit të Kosovës do të jenë të papranueshme.
Shoqëria Lëvizja i bën thirrje edhe Tiranës zyrtare që të jetë më e zëshme në përkrahje të Kosovës, pasi kështu do t’i kontribuohej jo vetëm “normalizimit të marrëdhënieve” me Serbinë, por edhe stabilitetit, paqes e sigurisë në rajon e më gjerë.
