Ndonëse me mbështetjen e drejtpërdrejtë politike, financiare dhe institucionale të Shqipërisë, për herë të parë janë hapur zyrat e Këshillit Kombëtar Shqiptar në Medvegjë, në këtë ceremoni nuk ka marrë pjesë ushtruesi i detyrës së ministrit tê Jashtëm të Shqipërisë, Gent Cakaj, raporton portali Front Online.
Sipas burimeve tê Front Online, Cakaj nuk është lejuar nga autoritetet serbe ta vizitojë Medvegjën dhe të marrë pjesë në këtë ceremoni të organizuar.
Cakaj poashtu javë më patë ishte refuzuar nga Qeveria e Serbisë të shpallet qytetar nderi i Bujanocit, ndonëse Kuvendi Komunal me shumicë votash kishte marrë këtë vendim.
Sipas Qeverisë në Beograd, Cakaj nuk e meriton titullin qytetar nderi i Bujanocit, me arsyetimin se e ka akuzuar Serbinë për krime lufte në Kosovë.
Përndryshe, në ceremoninë e hapjes së zyrave të Këshillit Nacional Shqiptarë në Medvegjë ka marrë pjesë vetëm kryetari Ragmi Mustafa dhe deputeti i Parlamentit të Serbisë, Shaip Kamberi, por nuk janë parë të pranishem edhe përfaqësuesit e tjerë politik nga Lugina.
Ministri Cakaj në një postim në “Facebook” ka shkruar se kjo zyrë do të luajë një rol shumë të rëndësishëm në mbrojtjen dhe lartësimin e të drejtave themelore të shqiptarëve në Medvegjë.
“Hapja e kësaj zyre ka qenë detyrim kombëtar i kahmotshëm i Shqipërisë, por tani është edhe imponim i disa rrethanave politike: procesi i fshirjes së adresave të shqiptarëve ka zvogëluar dukshëm peshën politike të faktorit shqiptar në Medvegjë. Kjo zyrë, në bashkërendim të plotë me Shqipërinë, duhet të punojë fort në kundërshtimin e politikave të fshirjes krejtësisht të qëllimshme të adresave të shqiptarëve”, ka shkruar mes tjerash Cakaj. /Front Online/
